Thailand khawpui, Bangkok-a Senior World Muaythai Championship 2023 khelh mekah India-in beisei phak rih lo mah se India aiawha khel, Mizo tlangval, Lalngaihawma, Hunthar chuan a khelhna, -48kg huangah semifinal a lut a, medal a hawn ngei dawn tih a chiang ta.

Ngaihawma hian Inrinni tlai khan quarterfinal-ah a khingpui, Adele Vincent Rosales, Philippines chu round thum inbeihna round hnuhnung berah a knockout a ni.

Round hmasa berah che tha tawk lo mah se round hnihnaah a insiam tha a, round thumnnaah a khingpui na taka nawrin front kick leh a kuttum hmangin a ching chau a, Philippines fighter hi referee-in tum thum a count-naah chiang kuang takin a knockout ta a ni. 

Ngaihawma hian world championship leh international level-ah tawnhriat a la neih loh avangin tun tuma India aiawha a tel hi a tan thil thar a nih thu leh rilru lamah pawh harsatna a tawh deuh thu a sawi a, chutihlaiin a khelh chhoh zelnaah inrintawkna nasa zawk a neih belh zel avangin world champion nih ngei a tum thu a sawi. 

Result hriat theih chinah India player pasarihin khel tawhin Mizo tlangval chiah hian semifinal a thleng a, Pathiannia inkhel result a zirin India-in medal lak theihna an la nei.

Ngaihawma hian semifinal a luh tawh avangin a lo berah bronze medal a dawng dawn a. Kum kua kalta, kum 2021 khan India aiawhin Jessica Lalruatkimi chuan world championship-ah silver medal a la a, hemi hnua Mizo player-in medal a lak leh hmasak ber tur a ni ang.

Thawhlehni hian Iraq player nen final luh inchuhin semifinal-ah an inhmachhawn ang.

Senior World Muaythai Championship-ah hian Mizoten international referee & judge pathum zinga pahnih, Liansangpuii Renthlei, Zemabawk North (Mizoram Police) leh Lalhlimpuia, Zonuam (Mizoram Police)-te chu India aiawhin an kal mek bawk.

Khawvel huap inelna lian, IFMA World Championship hian Inrinni thleng a awh ang.