ZALEN December 8, 2024 : Aizawl traffic police-ten Thawhtanni atangin ‘No Tolerance Drive/Checking’ an kalpui dawn a. Hetihlai hian tun dinhmuna Mizorama lirthei awm zat chu 3,23,083 a tling tawh.

Mipuiten Krismas leh kumthar him taka an hman theih nan lirthei kaihnawih dan bawhchhiatna hrang hrang avanga vanduaina thleng thei venna atan December ni 9-13,2024 chhung ‘No Tolerance Drive/Checking’ hi kalpui a ni dawn.

Hunpui lo thleng turah hian mipui veivah awlsam zawk nan traffic police pawhin ruahmanna eng emaw zat an siam bawk a. Lirthei chetsualna leh vanduaina a thlen loh nan mipuite chu kawng kânna tura siam (zebra crossing)-ah chauh kawng kân tura an ngen bawkah lirthei khalhtute pawh fimkhur se an duh tih an sawi.

Aizawl Traffic SP Stephen Lalrinawma chuan, “Hunpui vuakvetah hian mipui leh lirthei an tam dawn avangin duty pawh dah bit lehzual kan tum a. Mipuite chu duhna hmun hmuna kawng kan lova zebra crossing-ah chauh kawng kan turin kan ngen a, hei mai bakah over bridge hmang tangkai turin kan ngen a ni,” a ti.

Lirthei jam a ziaawm theih nan road diversion pawh siam a tul mai thei tih sawiin hei hi an siam a nih pawhin mipui nawlpui awlsamna tur leh hun reilo te chhung atan a ni tih hriaa hrethiam turin mipuite a ngen tih a sawi a. A tul angin maxi cab leh bus khalhtute chu zu an in leh in loh enfiahna (breath analyser) pawh an nei mai thei tih a sawi bawk.

Aizawl khawpui chhung hmun hrang hrangah naktuk atangin Aizawl traffic police te chuan driving license nei lova lirthei khalh, insurance certificate nunglo lirthei khalh, Pollution Under Control Certificate (PUCC) nunglo, mipui leh bungraw phur lirthei fitness certificate neilo te leh lirthei kaihnawih dan bawhchhiatna hrang hrang avanga vanduaina thleng thei venna atan 'No Tolerance Drive/Checking' hi an kalpui dawn a ni.

Traffic police te chuan lirthei khalhtute dan zawma, fimkhur taka lirthei khalh turin ngenna an siam a, lirthei document fel fai tak nei turin mipuite an ngen bawk.

Hetihlai hian tun dinhmun (31.11.2024) thlenga Mizoram a lirthei awmzat chu 3,23,083 a tling tawh a, heng zinga a tam zawkte chu Aizawl khawpui chhung a awm a ni.

Lirthei awm zawng zawng zinga 2,22,023 te chu two wheeler niin, car 53,699 a awm bawk. Transport department tarlan danin, 31.3.2020 thleng khan Mizoram-ah lirthei 2,07,885 a awm laiin, 31.11.2024 thlenga lirthei awmzat erawh 3,23,083 a tling tawh thung. Kum 4 chuang hret chhunga lirthei punna hi 1,15,198 a tling.