R. Zomawia, ITI

Tuna kan chief minister hrawn mek, Pu Zoramthanga’n chief minister a nih hmasaka a rawt chhuah, Green Mizoram Day  kum tina kan hman zui tak chu ‘thangkhat lian’ zet a lo ni ta a.  MNF sorkar a tla a, Congress sorkar kan neih zui hnuah pawh phur takin he ni hi kan hmang chho ta zel a. He ni den chhena thing kan phun hi dam khaw chhuak vek se la a tam tham tawh hlein a rinawm.

A tirah khan Mizo ze pangngai phawk chhuak (apply) zo takin  haw haw-in kan bei a;  sorkar department tam tak khan intihhlimna nipahfawmin a huhoin thing kan phun mup mup kha a ni a. A hun lai kha chuan a nuam thin ngawt mai. Amaherawhchu, sorkar khan tul loa sum sennaah ngaiin, a vak chhuak tam lo zawngin ruahmanna a siam leh ta a. Thing phunna tur pawh motor kawngpui dungah pawh, thing phunna tur hmun bikte a ruahman leh a. Heng hi ruahmanna tha tak a ni awm e. A tira bul kan tan dan kha a fuh lo hul hual a. Picnic paha hna thawk, lo zawh  nia hlo thlo ang deuh chauh  khan ei leh in nen kan sawngbawl  a. Kha tih lai atang khan thing phun hi haw hawa kalpui chi a nih loh zia khawi khawiah emaw chuan ka sawi ve chamchi a. Kei ni ang rual sawi chu a sawt lem hlei lo a. Hun a lo kal deuh a, mi thahnemngaiten chanchin buahte an rawn sawisel ta a.  Sorkar kha a ip ta deuh a.

Hmun thenkhatah chuan khang laia thing tiak phun kha   a hlawh tlinna hmuh tur a awm ngei ang a. Mahse kan tha thawh leh sum sen zat chhut chhuak ta ila kan hlawhtlinna hi a percentage a chhe viauin a rinawm. Chu chu a tir atanga ruahmnna fel tak kan neih loh vang a ni tih alang reng. Secretariat chhim chhawng lama thing phunte hi a hmun hma a hnai vai a, enkawl zui a hlawh deuh bawk a, hmuh a nuam ta viau. Dinthar Veng leh Chawnpui ep lama kawng hrula phunho erawh chu enkawl zui a hlawh loh avangin puitling ta sawi thama a awm lo a. He lai kawng hi ofis kalkawnga ka hman, ni tina ka zawh thin a ni a. Thing eng emaw zat kha a bul tih fai loh, hnim leh hrui zamin a bawh a, a zem hnante an ni a. Enkawl zui tak taktu an awm lo tih ka mit ngeiin ka hmu thin a. Ngaihsak zui dan turah ruahmanna fel deuh awm se tih ka duh hle thin. NGO tute emaw chuan hnatlangin vawi hnih khat chu an tifai awm e.

Kei hi thing phun a, environment lam humhalh hi ka tuina tak a ni a. Aizawla kan in leh a velahte pawh hian thing ka phun nual  a. Pakhat chu Vellore atanga ka hawn a ni a, a dang chu Phullen atanga a tang ka hawn a ni ve thung a, nun an tihlim tham tawh viau. Sorkar hna kan zawm tirh lai 1980 chho-ah khan  Forest department-ah hna ka hmu a. Ka zawm ta lo a. Environment leh a kaihnawih lam hi  ka beng khawn ve em em mai a. Mahse, mahni in leh lo atanga sorkar hna thawh theihna ka hmu a, chu chu pension thlengin ka thawk ta zawk a. Sorkar hna ka thawhna hmun dangah pawh a remchan dan ang angin thing phun hi ka buaipui ve a, vawi khat chu Kolasib khawpui chhung kawng dung tluanah khuan thing  phun dan kawng a awm em tiin Kolasib DFO hnenah ka lengin rawtna ka siam  a. Ani min chhanna erawh chu, “Drugs leh zu ruiten an pal chhe mai mai ang, a hungna pawh a tlo theih loh hi,” a lo ti a. A bei dawn thlak viau nain dikna thui tak a nei lawi si. Mahse, ka staff te nen tlema zawng chu kan phun ta tho a. Kolasib Diakkawn, auto stand bulah khuan Chawnpui kung khat chu a la ding ve hram a nih khu.

Thing phun kan uar chhoh zel rual hian mumal taka enkawl dan kan ruahman lo hi a pawi a. A tir atang khan ruahmanna fel tak lo nei ila, kan hlawh tlinna a hmuhnawm nawm tur zia ka ngaihtuah a. Hun leh tha kal ral zo zai kha  a uihawm ngawt mai. Thing phun tam kan duh a, kan phun teuh a. Puitling a tlem leh si a. Chu ai chuan tlem deuh zawk, hneh deuha enkawl theih hi a hlawk zawk tih kan hriat saah ngai mah ila, kan hriatsa hi i ngai pawimawh hre thar leh ang u. Sorkar department-in kan enkawl zui thei lo a nih pawhin NGO-te nen inremna neiin, enkawl hah man tlem azawng inpein kan kalpui theih a rinawm a. Hetiang hian a tir atang khan bul tan ni ila sum sen ral pawh a man hla zawk ngei ang. Pawl leh sorkar emaw pawh ni ila thing tiak 10 (sawm) bak pawl pakhatin tum khatah phun lo ila, kumtluanin enkawl ve thung ila. June thlaa kan phun, a kum leh June thlaa kan tifai leh ngawt thin ang hi chu i bansan tawh ang u.

New Delhi ah Urban Management zira kan kal tumin an khawpui kawng dunga thing phunte khu municipal hmalakna a nih thu ka hria a. Awh awm ka ti a. Ka training zawh a ka haw chu ka  thawhna department-ah ‘urban forestry’ tiin  thing phunna atana sum hman theihna tur ‘plan expenditure head’ kan hawng a. Municipal kan neih zui tak avangin kan hmang tangkai hman ta vak lo a. Aizawl khawpui kawng zau laiah pawh hian zau tha takin lei lai khuar ila, a hungna tha tak nen kawtthler tinuam tura thingphun theihna a la awm nual a. Electric hrui ni se an zial fel viau tawh si a.

Mi thiamte ngaih dan chu ka hre hauh lo a, thing tiak  ka phun hian a bula tuamtu polipot hi paih phal loin a mawng lam chauh ka paih a. Ka phun ta mai a. Polipot-in a la tuam avangin hnawng a pai rei a, a nung duh bik ni ngeiin ka hria a. Thing tiak a lo lian a, polypot chu a rawn tawn thler ve mai a. A mawih zui bawk a. Thing tiak kan phun hian a zung tuamtu polypot hi kan paih vek thin a, nunga dam khaw chhuak tur chuan phun tirh leh a hnu eng emaw chen hnawng tha tak mamawh kha a ni si a. Lei hnawng kha a vela leiin a hip ralsak thei si a. Ruahin a nan/chawm char char a nih loh chuan thingphun a thi duh lo thei ta lo a. Mahse, hei hi environment lam thlirna atang chuan, leiah polythene kan hnut chhiah zel dawn tihna a nih  avangin ngaihtuahna hman deuh chu a tha awm e.