Aizawl: Nimin chhun dar 12 khan Miss Chapchar Kut 2017 lawmman hlanna chu Vanapa Hall ah neih a ni a, Mizoram Women Commission Chairperson Vanlalawmpuii Chawngthu, MLA chu khuallian niin tunlai thalai ten ngaihsan tur dik an chhut ngun a pawimawh tih sawiin thalai te mahni chhungkaw mil leh chhungkaw sum lakluh mila inchei chu pawimawh a tih thu a sawi bawk. Chapchar Kut Miss lawmman hlanna inkhawmah hian khuallian Vanlalawmpuii Chawngthu chuan thu sawiin hun eng emaw chen lo buatsaih tawh Chapchar Kut Miss thlanna chuan Mizo hnam incheina a chawisan phaha a hriat thu a sawi a. Miss a thlan thar te fuihin khuallian chuan, "Thenkhat an lar a, kut hnathawh an hreh em em thin a, inchhung khura chet leh kan thawh thin ang ang te tha takin kan thawh chhunzawm reng tur a ni, " a ti a. Nu leh pa zah a pawimawh thu sawiin, "India ram hmun danga hnam dang te'n nu leh pa an zah em em laiin keini Kristian te hian nu leh pa kan zah tawk lo em em a, nu leh pa kan zah hian keimahni pawh kan zawhawm a ni," a ti. Lawmman hlanna inkhawm hi Chapchar Kut Miss thlangtu Diktawn magazine editor Lalhmachhuana Zofa in a kaihruai a, lawmman te hi khuallian Vanlalawmpuii Chawngthu in a hlan a ni. Miss Chapchar Kut 2017 pakhatna hian Rs 10,000, washing machine, photo frame, Rs 5000 man hu lehkhabu leh citation a dawng a, top 5 te hian pawisa leh lehkhabu photo frame leh citation an dawng bawk a ni.