ZALEN October 8, 2025: G.I.G Motors chuan Maruti Suzuki kutchhuak thar ber Victoris chu vawiin khan Maruti Suzuki Arena, Edenthar-ah Motor sport lama sulsutu Lalrawngbawla, DEO Khawzawl district chuan a tlangzarh.

Victoris hi tunlaia lirthei technology thar ber ber bilhkhawmna a ni ber a, lirthei changkang awm tur ang chi chu a awmkim vek a tih theih a, Maruti Suzuki pawh hian he lirthei hi a chi hrang (variant) an siam thahnem hle a, Victoris 1.5L 5-Speed Manual Transmission (SMT) -ah hian model chi 10 a awm a, a man tlawm ber hi tlan thei dinhmuna ding tura sen ngai tihfel vek (On Road) hnuah Rs 12,28,789 man niin a to ber chu Rs. 18,52,629 man a ni thung.

Victoris 1.5L 6-Speed Automatic Transmission (6AT) -ah hian model chi 9 a awm a, hetah hian a tlawm ber chu Rs 15,49,948 (On road) a ni a, a to ber hi Rs. 20,72,765 a ni. Hei bakah hian model dang Victoris 1.5L Strong Hybrid (eCVT) -ah hian model chi hrang chi 9 a awm bawk a, a tlawm ber chu Rs. 18,95,347 man a ni a, Rs. 23,05,105 chu a manto ber a ni.

Maruti Suzuki Victoris model ho zingah hian Victoris 1.5L AllGrip Select (GAT) model ho hi a to ber an ni a, he huangah hian model chi li a awm a, a tlawm ber pawh Rs. 21,59,292 a ni a, a to ber hi ZXl+4WD 1.5L 6AT-ECA4AZW niin Rs. 25,40,496 man a ni a, hei hi Victoris hrim hrimah hian a to ber a ni bawk.

Maruti Suzuki Victoris hi a elpui tura ngaihte chu Hyundai Creta, Kia Seltos, Honda Elevate leh Skoda Kushaq te an ni a, C-SUV segmen-ah hian anmahni company tho Maruti Suzuki Grand Vitara bakah Toyota Urban Cruiser Hyryder leh Tata Nexon te hi a elpui tur te an ni.