ZALEN November 6, 2025 : Vawiin khan Kulikawn Ngaizel ngaw-ah Mizoram State animal Saza pathum hmuh a ni a. Heng Saza te hi Solomon’s High School naupangten a thla an lo la fuh a. Association For Environment Preservation (ASEP) chuan lawmawm an ti.

ASEP chuan hetianga Aizawl khaw chhungah ngei State animal hmuh tur an awm hi ASEP General Headquarters, Aizawl chuan lawmawm a ti a, humhalh tlattu ni turin mipuite a sawm.

Heng Sazate hi Kulikawn Local Council leh YMA te pawhin theihtawpin an humhalh a ni tih ASEP chuan an hriat thu an sawi a, an chungah lawmthu an sawi. Khawtlang hruaitute hmalakna tawiawmtu ni theuh turin ASEP chuan mipuite a sawm a. Heng Sazate hian kutpalh an tuar a nih chuan dan ang taka hmalak a nih theih nan ASEP chuan a tawp thlengin hma a la dawn a ni.