ZALEN July 13, 2026: Aizawl District Disaster Management Authority (ADDMA) Chairman, Aizawl DC Er. Lalhriatpuia kaihruaina hnuaiah vawiin khan Aizawl khawpui huam chhunga lung tlak avanga thihna leh harsaatna hrang hranga thleng thei laka mipui te an him theih dan tur ngaihtuahin an thukhawm.

Meeting-ah hian Aizawl khawpui huam chhunga lung tlak hlauhawmna hmun: Ngaizel phei, Bawngkawn-Durtlang Road, Chanmari – Chaltlang Road, Chanmari- Ramhlun road a hmalak dan tur te ruahmanna siam a ni a. Tuna Ngaizel lungtlak mekna pawh a chhak lung tlak hlauhawm la awmte scaling hmanga thenfai a, a theih anga draping (tuam) lailawk tura ruahmanna siam a ni.

CEO, ADDMA bakah sawrkar department hrang hrang – DM&R, PWD, Geology & Mining Department, Traffic, BRTF, Zonal Officer te leh Local Council aiawhte bakah State Technical Assessment Team for National Landslide Risk mitigation Program (NLRMP) aiawhte vawiin meeting-ah hian an tel a ni.