ZALEN August 19, 2026: PWD Minister Vanlalhlana chuan vawiin khan Ngaizel lung tla thin laka kawngpui âna awm te leh kawngpui zawhtu mipui leh lirthei te an him zawk nan a, ADDMA, PWD, G&M ten lung tla mai thei tur an karthlak (Scaling) zawh tawh te leh lung tla te direct taka kawngpuia an tlak lohna tura kopang/kham tuam hna “draping” an thawh te a enfiah.

Minister Vanlalhlana chuan Tuna “Green Draping HDPE” aia tha zawk leh tlo zawk tur “Shotcrete” hmanga lungtla te venna tur Shotcreting Machine (wire mesh a tuama, cement, balu etc. chawhpawlh a phuhna khawl) leina turin PWD lamin proposal siamin, Shotcreting Machine leina tur hian Quotation koh mek a, estimate nen an la submit thuai dawn a ti.

Ngaizel kham tuam (Draped) nana hman hi Green Draping HDPE (High Density Poly Ethylene) a ni a, Ruah leh nisa laka leilung a ven bakah, leivung leh lung lian lutuk lo chu dang zo tura beisei a ni a. Mizorama vawikhat hmanna anih avangin,a daih rei zawng tur kum erawh an sawi thei loh thu G&M Geologist te chuan an sawi a, Trial stage-ah a la awm mek a ni, an ti. 

Ngaizel kham/kopang tuam nan hian Green Draping HDPE roll 13 hman niin, cheng nuai 19 sen a ni. He Green Draping HDPE hi ADDMA (Aizawl District Disaster Management Authority) in a lei a ni.

Kum 10 kal ta chhung khan Ngaizel lungtla avang hian mi 3 in nunna lo chan tawhin, Lirthei ke 2 leh ke 4 nei chi, avaiin 16 a lo del chhe tawh a, hliam tuar 8 an awm tawh bakah Kawngpui ân a awm In te a lo delchhe nual tawh a ni.