Aizawl; April ni 17, 2014 zan dar 10:30 vel khan Kulikawn - Ngaizel bulah Aizawl SP hnuaia CID District Secial Branch te chuan Pseudopherine, 'Khehpuam’ tia sawi mai thin Rs. 97,37,000/- hu vel an man. Thudawn danin tuna damdawi khehpuam an man zat hi Buhfai bag 9 leh Parcel 2, a vaiin bawm 11-a khung a ni a, hei hi kheh tawh sa leh, a Tablet hlang a ni. He damdawi mana inhnawmhnawihte hi Hrangthanzauvi (30) Tualte, (Tuna Kulikawna cheng mek); S Laldinliani (30) Mission Veng; Zoliansangi (38) Bungkawn veng thlang inti; Lalrisangi (41) Ramhmhlun Veng nia insawi; Lalruatthanga (30) driver (Khawkawn), S Lalrinthanga (27) s/o Kamzathanga, Khawkawn, tuna Khatla Aizawla cheng nia insawi te man an ni a. Hemi hnu hian lirthei hmantirtu a sawi Lalremsangi (36), tuna Aizawl Republic-a khawsa chu thu zawhfiah a ni a, ani hian he ruihhlo phurhna motor hi Congress party thupuangtu Lalrozara lirthei a nih thu leh an chhungte a nih avangin a tul tulah an hmansak mai thin tih a sawi a, chhui zui mek a ni. He damdawi phurtu Bolero M-01-H- 7168 pawh man nghal a ni. Hemi chungchangah hian MNF Party chuan thuchhuah siamlin, damdawi khehpuam phurtu Bolero neitu, Lalrozara chuan a mantu, Police leh CID Crime Branch a mite chaltlaî taka tawng khumin,Ruling Party a nihna chapo pui takin a vau niin an sawi a. Heti anga invauna hi MNF chuan an dem thu leh an ngaihthiam theihloh thu sawiin, he thila a lo inhnamhnawihna hi thuneihna hmanga rahbeh leh chinfel mai mai chi niin kan ngailo, an ti.