Aizawl; HIV/AIDS darh zel tur venna kawnga thawktu pawl inzawmkhawm Federation of NGOs working in Drugs and AIDS Prevention and Care (FONWIDAPAC) chuan an hmalakna tawiawm tha turin mipuite an ngen. Nimin Aizawl Press Club a thuthar lakhawmtute an kawm naah FONWIDAPAC hruaitute chuan an pawl chuan drugs a inchiu thin zingah te, KS, mawngkawhur leh pemkual thin zingah te hma an la thin tih an sawi a. An hmalakna avangin drugs hmanga inchiu thin zingah HIV vei thar an tlahniam tih sawiin, "kum 2001-ah 52.4% lai syringe inhman tawm atanga HIV kai anih laiin kum 2013 ah chuan 16.8% ah a tlahniam a. FSW (KS) tam zawk pawhin regular taka an customer te an hman tir avangin HIV kai thar pawh hi an tlem viau tawh a, mipui nawlpui zawk hi condom hman chungchang kan la ngaih pawimawh tawk loh avang erawh chuan sex atanga HIV kai hi kan pung tial tial thung a ni," an ti.HIV kaithar 89.2% chu sex atanga kai an ni tiin "Condom hman kawngah tun aia nasa zawka inzirtir kan ngai a ni," an ti bawk. FONWIDAPAC hruaitute chuan an hmalakna chu mi tam takin la hrethiam lovin sum leh pai it vang mai mai a hnathawk ah an la ngai tih an sawi. An pawl chuan Hepatitis B leh C darh tur thlengin an veng niin an sawi a. An pawl chu mipuite tana din a ni tih an sawi.