Aizawl November 26, 2023 : Mizoram inthlanpui duty tura lokal, a duty laia Ngopa atanga bo Assam Police constable Sabin Nath (42) chu vawiin thleng khan hmuh a la ni lo.

Sipai bo chungchang ngaihven hian Zirtawpni khan Assam Police atangin Akhilesh Kumar Singh IPS, IGP (Training & Armed Police) & Communication chuan Ngopa a tlawh a, Saitual SP Pukhraj Kamal IPS leh Addl. SP F. Lalbiakzauva ten an tawiawm.

Akhilesh Kumar Singh hian Ngopa khawtlang hruaitute kawmin police bo zawn chungchanga an hmalaknaah lawmthu hrilhin theihtawp chhuaha zawng chhunzawm turin a sawm bawk.

ZALEN-in a biaknaah Ngopa VCP K. Lalremsiama chuan a nawlpuia khawtlangin ni 7 an zawn tawh avangin khawtlang huap ang chuan zawng tawh lovin a theih ang angin an ngaihven niin a sawi a. Ngopa mipuite bakah khaw thenawm te pawh lo ngaihven turin an chah nia sawiin tun dinhmunah chuan a bo danah han zawn zel dan tur an bang bo hle niin a sawi bawk.

Constable Sabin Nath, 9th Assam Police Bn. hi November ni 5, 2023 (Pathianni) zing dar 6:00 khan a inkulhna hmun Govt. Middle School -II, Ngopa atanga uniform ha chunga a chhuak chu tun thlengin chin hriatlohin a bo a, ngawrh taka Police leh NGO hrang hrang ten an zawng chungin t un thlengin hmuh a la ni lo.

October thla tawp lam khan Kawlbem khaw putar pakhat chu a bo bawk a, ani pawh hi khawtlangin ni 7 zawngin an hmu lo a. He putar hi mi tlawmngai ten ngaihven zui mah se, tun thlengin hmuh a la ni lo bawk a ni.