ZALEN January 13, 2026: Upgradation of Sports Infrastructure of Ngopa Playground hawnna leh Pathian hnena hlanna hun chu vawiin khan hman a ni a, PWD Minister Vanlalhlana chu Khuallian niin Minister F Rodingliana, bialtu MLA chu Khualzahawm a ni.

Vanlalhlana chuan, "He hna hi tha taka zawh a ni thei hi lawmawm ka ti hle mai a, thla 18 chhunga zawh tura ruahman niin thla 9 chhunga zawh a ni hi ka lawm leh zual a ni. Kalphung thar hnuaiah chuan hna a tha tur a ni a, a hun taka zawh a ni tur a ni tiin kan sawi thin a, helaiah a taka hmuh tur a awm hi lawmawm ka ti em em bawk a ni," a ti a. 

"Kan tih thin pangngai kan ram tana tha lo te kan tih loh hi kalphung tharin a ken tel a ni a, kan fel famkim kan ti lo va, eiru lo turin kan intiam a, tunah hian Mizoram chu India rama eiruk tlemna state ah pahnihna kan ni mek a, uchuak taka MLA te lirthei leina pawh nasa takin kan tihniam a ni," a ti bawk.

Hlana chuan, "Hna reng remg tha taka thawh a nih theih nan a vilveng turin Project Monitoring Committee kan din a, anni hian hnathawh reng reng a that leh that loh an endik thin a, an result pawh kum hnih chhung hian kan hmu a ni," a ti a. "Kan ram hi a tha zawngin a kal chho zel niin ka hria a, kum reilote chhung hian hmasawnna hmel thahnem tak kan hmu mek zel a, sawiselna karah pawh Mizoram leh mipuite tan hma kan la zel dawn a ni," a ti bawk.

Upgradation of Sports Infrastructure of Ngopa Playground hi NEC funding niin ₹ 3,74,43,801.00 senga sak a ni a. Ni 15.03.2025 ah thawh tan niin ni 30.9.2026 ah thawh zawh a ni a, a hna hi Project Division III PWD Mizoram te enkawl niin F Lalmalsawma, Tuikual South in a thawk a ni.