ZALEN January 16, 2026: MPCC te chuan vawiin khan Golden Hall, Congress Bhavan ah Political Session an hmang a, he hunah MPCC Vice President Ngunlianchunga, MLA chuan Chief Minister Lalduhoma zawhna a zawt a, VIP culture kan ti bovang a tih te kha an ti bo ta em?" a ti.

Ngunlianchunga chuan, "Tuna Mizoram mipui nuaih 12 vel hian dikna a rorelsaktu an mamawh a ni. Mizoram mipuite hi i bum i bum lovang u. Kan Chief Minister hmasa Pu Zoramthanga khan thudik a sawi thin ti ila, miin an ngaihdan chu in hre mai ang, tun a mi hian kan CM hmasa kha a khum an ti. Political platform a kan din vang hian dawt kan sawi mai mai tur a ni lova, thudik kan sawi tur a ni."

"Kan CM chuan 'sawrkar hmasa te sum bat cheng vaibelchhe 6311 kan rul tawh a, keini chuan leiba hnutchhiah kan tum ve lo' te a ti a. Vaibelchhe 6311 chu tu hnenah nge an pek, Administrative Approval a awm em, Expenditure Sanction a awm em tih ka zawt duh a ni. Tun sawrkar hian engang pawhin kal dik tum se a leiba pek bang a nei dawn tho tho," a ti.

Chief Minister chu zawhna zawtin, "Kan ti ang an tih an ti lova, kan ti lovang an tih an ti leh a. Contract hna chu contractor chauhin an thawk tawh ang an ti a, mi hmingin contract an thawk a, mulukawlh in saruang an inchuh ang mai in an inchuh leh a. ZPM Chief Minister chu car man tovah a chuang ve lovang a ti a, Mizoram Chief Minister ni tawh zawng zawngah a car man a la to ber. Pu Lalduhoma hi ka zawt duh a ni, VIP culture kan ti bovang a tih te kha an ti bo ta em?" a ti.

BJP an hlau nia sawiin MNF Vice President chuan, "Kan Chief Minister Pu Lalduhoma hian BJP a hlau em em a, an tel lovin District Council ah ZPM in sawrkar an siam ngamlo. LADC-ah pawh sawn MNF leh ZPM khan sawrkar siam tum in thuthlung an ziak a, chawlhkar thum a ral hnuah pawh Governor office atangin engmah hmalakna a awm loh avangin MNF lam khan ZPM hotu lu lamin sawkar siampui turin an duh lo ni a ngaiin Congress sawrkar siampui turin min sawm ta zawk a ni."

"ZPM sawrkar hian BJP hi an hlau hle a, kan Governor pawh hian engahmah a ngai lo niin a lang. Kan Governor Office atangin file pawh an nawr chhuak hlei thei lo a ni. Governor hian sawrkar hi engahmah a ngai lova, hmanni lawka Council of Minister ten CADC chungchanga an thurel pawh engahmah ngai lovin a suspend chhunzawm zel a ni," a ti.

Ngunlianchunga chuan, "District Council inthlan hi Mizoram sawrkar hmel lanna an ti thin a, LADC inthlanah khan ZPM chuan seat 6 chiah an la thei a, rorel lai party in chutiang zat lek seat an la ngai lo. Tunah hian Congress hian hma kan sawn em em a, LADC a Independent a ding te khan 'Congress ah lo ding ila kan tling ang mawle' an ti hial a ni. Mite pawn 'Congress kha an lo tha ber a nih hi' an ti tan tawh a ni. Chuvangin thawkrim i la, Mizoram siamtha turin kan sawrkar leh ngei ang," a ti.