ZALEN May 9, 2026 : ZPM Thalai chuan vawiin khan an President Jeje Lalpekhlua hovin a thawh riatna atan NH-06 Sairang - Kawnpui inkar kawng siam chu a hmunah an enfiahna a, Inspection & Monitoring an neih hmasak ber February 21, 2026 a NHIDCL, J Infratech Ltd. leh BR Goyal Ltd. ten an hnena intiamna an lo neih tawh, April leh May thla chhunga an chanpual siam zo vek tura an intiamnate an bawhzui tha niin an hmu a, furpui hmachhawn zo tura NHIDCL leh ZPM Sawrkar hmalakna ah ZPM Thalai-te hi an lawm tih an sawi.

ZPM Thalai General Headquarters President Jeje Lalpekhlua, MLA chuan, "NH-06 Sairang-Kawngpui hi nikum furah Sawrkar leh pawl hrang hrang ten kan buaipui nasa a, ZPM Thalai chuan Inspection leh monitoring te pawh kan mawhphurhna ah dahin, Group-a inthenin kar tin detailment siamin kan tlawh thin a, nikum ngaihtuah chuan tun dinhmunah chuan hmasawnna tam tak kan hmu a, hetianga hmasawnna kan hmuh theih chhanah kan Sawrkar hotute - a bikin kan Chief Minister Pu Lalduhoma'n theihtawp a chhuah a, NHIDCL leh Company-te nen sawihona te neiin, vawiina hmasawnna kan hmuh hi ZPM Sawrkarin chak taka a nawr vang niin kan ngai a ni," a ti.

"Hna hi thawh zawh a la ni lova, 80% vel tawh zawh tawh a ni a, hmabak la awmte pawh reilote chhunga thawh zawh beisei a ni. Vawiina kan dinhmun atang chuan nikum fura harsatna kan tawh angte tawk tawh lo turin kan in ngaia, kan dan zawh loh khuarel chhiatna a thleng te a nih ngawt loh chuan motor lian tangte pawh a awm tawh loh kan beisei a ni," a ti bawk.

ZPM Thalai hruaitute chuan helai kawng enkawltu NHIDCL hnuaia Company pahnih - J Infratech Ltd. leh BR Goyal Ltd. te an tlawh nghal a, an hna hmachhawpte zawhfiah nghal niin, Buichali leh Sairang inkar enkawltu J Infratech te chuan ni 15-20 thawh tur hna an la neihthu an sawi a, Buichali Lei leh Sairang inkar chu May 12. 2026 (Monday) atangin Resurfacing leh Pads Repair an chhunzawm dawn a, harsatna an tawk a nih loh chuan ni 15-20 chhungin an hnate an zawhfel theih tur thu an sawi a ni.

Buichali Lei leh Mualkhang Inkar enkawltu BR Goyal Ltd. chuan an hna chanpual chu an zawh tawh thu leh NHIDCL lamin Inspection pawh an neih tawh thu an sawi a, a leilung zir loh vanga a tlo lai tur awm ang te NHIDCL ah report pein helai kawnga an chanpual chu zo fel tawhah an inngaih thu report an lo pe bawk a ni.