ZALEN August 12, 2026 : Serchhip District thuneitute leh Serchhip District MJA te chuan vawiin khan NHIDCL hnuaia Shivalaya Construction Ltd. leh KRAM Infracon Pvt. Ltd. ten National Highway 54 - Khumtung to Keitum inkar kawng an repair mek an enfiah. 

Shivalaya Construction Ltd. in Khumtung dai, Serchhip District atanga Baktawng ChanIn thlen hma, kms 5 kawng an repair chu tha thawkhat hle nia an hriat laiin Baktawng Mualkawi dai atanga Keitum inkar kawng siamtu KRAM Infracon Pvt. Ltd. te hnathawh erawh a muangin duhthu a sam lo hle niin an sawi a, kawng repair na atana lung hmun 5 laia an chhekkhawl sa pawh Quarry lung a nih loh avangin an paihtir nghal.

Nimina National Highway 54 - Khumtung to Keitum inkar kawng siam mek endik hna hi Chawngthu Lalrinhlua SDC in a hova, MJA lam hi an President Kapliana Pachuau in a ho thung. NHIDCL lam atangin Ram Niranjan Parsad, Resident Engineer leh Jiten Raut, Field Engineer te an tel a, Kram Infracon Pvt.Ltd. a Public Relation Officer (PRO) Lalhruaitluanga a tel bawk.

Serchhip District chhunga National Highway-54 Phase-1 Khumtung leh Baktawng Mualkawi inkar 5 kms hna thawktu Shivalaya Construction Ltd. te hnathawh hi a tha thawkhat hle a, kumin furah an kawng siam 5% vel chiah repair ngai a awm a, chu chu tha takin an repair mek a, an zo fel khat tawh a ni.

Phase II, Baktawng Mualkawi Via Serchhip By Pass Road to Keutum inkar kawng siamtu KRAM Infracon Pvt. Ltd. te hnathawh erawh a chhe hle a, kumin fur chho ah an kawng siam sa 80% aia tam mah chu repair ngaiin a chhia a, hei hi an lung hman quality that tawk loh vang niin a lang a, District thuneitute leh MJA ten an enfiahna ah pawh Quarry lung ni lo tih hriat ngawih ngawih, leiminna hmun thenkhat atanga an lak lung Truck Trip 5 lai mai chu paihtir leh an ni.

Hetihlai hian Phase-III, Keitum leh Bungtlang inkar hnathawktu Bhartia Infra Projects Ltd. te kawng siam erawh a tha thawkhat hle a, sawisel tur leh repair ngai a awm lo thung.

NHIDCL hnuaia Baktawng Mualkawi to Keitum inkar kawng siamtu KRAM Infracon Pvt. Ltd. te hi August 7, 2026 khan NHIDCL ten warning pe in ni 15 chhung (August 22 ralhma) a lirthei kal theih tura kawng chhia repair zo vek turin hriattirna an pe a, Serchhip DC Paul L. Khuma pawhin KRAM Infracon Pvt. Ltd. te hi a tuldan a zira an chunga Legal Action lakah a lo vaukhan tawh bawk a ni.