Mizorama kawngpui sial hna thawk mek NHIDCL (National Highways and Infrastructure Development Corporation) chu an leivung paih danah dan dinglai an bawhchhia nia puhin mi thahnemngai thenkhat te chuan thuneitu sang hnenah an hnathawh mek titawp turin an ngen a. Mi thahnemngai te ngenna ang hian hmun thenkhata an hnathawh mek chu chawlhtir hrih an ni.

National Highways and Infrastructure Development Corporation te hian kum 2020 vel atang khan Mizoram hmun hrang hrangah hna thawk tanin Mizoram chhim leh hmar, khawchhak leh khawthlangah te vung an chhuah terh turh mai a. An hnathawh pawh a tha viau niin a lang a, hmun thenkhatah chuan an kawngpui sial pawh mipui ten kan chhawr tangkai tan nghal hle. Mizoram state ah hi chuan kawngpui hi hmasawnna atana kan mamawh ber a tih ngam hial awm e. 

Hmasawnna hna thawh dawn reng rengin engtin nge mipui ten an chhawr tangkai a, an hlawkpui dan ber tur ni ang tih chu ngaih pawimawh hmasak a ni thin a. Hydel project te pawh lo siam dawn ta se an siamna senso leh an power pekchhuah theih zat tur nen chhutin siam tlak a ni em? Ram engtia zau nge a chimchhiat dawn? Mipui ten engtiang takin nge an chhawr tangkai ang tih te chu tehfung pawimawh tak a ni thin a ni. Chutiang zelin kawngpui sial chungchangah pawh hian dan leh hrai zawm tur thahnem tak a awm a, leivung te duhna hmun hmunah paih ngawt theih a ni lo a, a paihna tur hmun bik siama paih tur  ani a. Nungcha leh thing leh mau te tawrh loh theih dan ber tura hmalak tur a ni.

Tunlaia National Highways and Infrastructure Development Corporation ten Mizoram hmun hrang hranga kawngpui an sial mekah hian dan leh hrai te an zawm tha tawk lo hle niin a lang a, an kawnglaihna leivung te chu a paihna hmun tura ruatah paih lovin kawngthlang lamah an nam liam vel mai mai a. Hei hian lui te chhilhin tuihna a ti kang a, luidung nungcha te chenna tur a chhilh bo a, chumai ni lovin thing leh mau thahnem tak a tih chereu mai bakah sava leh ramsate chenna tam tak a tichhia a ni. Dan an zawm loh avanga mi thahnemngai ten an ngaimawh hi a awm a, huai takin kal zel se a duhawm hle.

Mizoram hi state dangte ngaihtuah chuan hmasawnna kawngah kan la hnufual hle mai a, hmasawnna hnuk pawimawh tak kawngpui tha kan nei chho mek zel te hi a lawmawm hle. Hmasawnna hian a tha zawng leh tha lo zawng hian kentel a nei ve ve a, kawngpui tha neih kan duh chuan kan ramngaw engemaw zat chu a chereu a ngai ve tih hi kan hriat a ngai a. Chutih rual chuan ram leilung, thing leh mau bakah nungcha ten an tawrh loh theih dan ber tura hmalak hi hmasawnna hna thawktute hian an mawh a ni tih an hriat tel erawh a tul hle.

NHIDCL te hi state pawn atanga hna rawn thawk an nih vang nge ni tih mai tur hian anmahni awlsamna tur hi an zawng lutuk deuh niin a ngaih theih a. Chumai ni lovin kan ram nungcha leh thlai te an dim lo lutuk deuh niin a lang. Hmasawn zel kan duh avangin tuna NHIDCL te hnathawh hi tihtawp ngawt theih a ni lo a, mahse tun aia fimkhur zawka an kal erawh a pawimawh hle. Kan ram sik leh sa nuam tak, thing leh mau, nungcha chi hrang hrang te venhim hi kan zavaia tih tur a ni e.