October 8, 2023; Lunglei - Tlabung NHIDCL kawng siam mek chu fur a ni chho nen lirthei tan zawh ngaihna awm lo khawp a ni mek. Lunglei leh Aizawl pan tur damlo te pawh nimin khan Lawng hmang a hruai an ni.

Tlabung atanga ZALEN thudawn danin, nimin (7.10.23) zing khan nu nau nei pai, Tlabung atanga Aizawl a refer chu Lawng hmang a hruai a ni a, Tlabung atangin Marpara panpui niin, Marpara atangin lirthei hmang a Aizawl panpui leh tur a ni.

Nizan (7.10.23) khan Tlabung mi tho damlo pakhat pawh Tlabung atangin Lawng hmang vekin, Lunglei panpui a ni bawk.

Damlo hi kawng lakah thisen te pawh pek a ni tih thudawnna chuan sawiin, Tlabung atangin Chawngte lamah an kal a, Lawngtlai lam helin Lunglei hi an pan a ni.

Media hrang hrang a tarlan tawh angin, Lunglei leh Tlabung inkar kawngpui hi NHIDCL kawng siamlai niin, Tlabung khawtlang pawhin chak zawk a siam turin NHIDCL hotute an lo ngen/nawr fo tawh a, Aizawl a an office tualah pawh lungawilohna an lo lantir tawh bakah, Larsap hnenah pawh an harsatna hi tunhnai khan an lo thlen tawh bawk.

Km 90 bawr vel a thui Lunglei - Tlabung kawng hi fur lai a ni chho bawk nen, lirthei tan a zawh ngaihna awm lo khawpin a awm mek a, hemi vang hian Tlabung leh a chhehvel khua te chuan harsatna hrang hrang an tawk mek a ni.