Aizawl August 7, 2024: Vawiin khan Kolasib DC Conference Hall-ah Kolasib DC Robert C Lalhmangaiha hovin National Highway chungchangah thutkhawmna neih a ni a, he hunah hian NHIDCL leh Contractor te chuan phalna la hmasa lo a approach road siam thin te, bungrua kawtkaia dan thin te leh side drain siam duh lo ten harsatna an siam thin thu an sawi.

Meeting-a NHIDCL hotute leh Contractors kal te hna kalpui tum dan te an sawi a. Contractor te chuan pawisa an hmuh veleh theih tawpin hma an la thin an ti a. A tul anga culvert te siam niin hmun thenkhat-ah Paver block-a an siam chu khawtlang mipuite ngenna angin concrete pavement a thlak a ni a, amaherawhchu a char chhung, ni 28 nghah a ngaih avangin duhthusam a hma lak chak theih a nih loh thin thu an sawi.

NHIDCL pawhin kawng sira phalna la hmasa loa approach road an lo siam thin chuan kawngpui ah tui a ti tling a, chu chuan kawngpui a tihchhiat thin thu an sawi. Quarry bula stonedust te, kawng sira vantlang mipuiten an hmanrua an dah thin te leh an kawtkaia side drain siam duh lo thin te chuan an hnathawh a tih harsat thin thu an sawi ve bawk.

Thutkhawmna kaihruaitu Kolasib DC chuan chuan an harsatna te hriatthiamawm tam tak awm mah se, mipuite mamawh thil pawimawh hmasa, a khuar zual lai hnawh leh tawhsual tawh theihna tur thawmthat zung zung a tul thu sawiin, VC te nena thawhhona tha neia an hun tiam chhunga zo fel tura tan an lak a ngai a ni, a ti. Tuna atang chuan khauh zawka District Administration pawh in an nawr tur thu leh tanpui an ngaih pawh in an tanpui tur thu a hrilh. A tuartu ber chu mipuite an ni a, chuvang chuan mipuite tan kawng him leh hman tlak siam chu an tihmakmawh a ni, a ti.