July 13, 2022; Mizoram sawrkar a Health department chuan, NHM, Mizoram hnuaia thawktu zawng zawngten, July ni 14, 2022 a an hna an zawm ngei nan controlling officer zawng zawngte hma la turin a hriattir a, hna zawm lo an awm a nih chuan an chungah sawrkarin dan anga hma a lak tur thu a hriattir bawk.

NHM, Mission Director chuan vawiin tlai khan Circular chhuahin, Controlling officer zawng zawngte chu anmahni Chief medical officer concerned te theuh kaltlangin, NHM, Mizoram hnuaia hnathawk, an hna zawm lo te chu NHM, Mission Director hnenah thlen thin tura hriattir an ni.

NEUM nawrh chungchangah hian Health department a Under Secretary chuan NHM Mission Director hnenah NEUM nawrh chungchangah lehkha pein, NEUM ten a hun taka hlawh an lak theih thin loh avang leh service chungchanga an lungawilohna lantirin, July 11-13, 2022 chhung nuarin mass casual leave an la tih a tarlang a.

He an thil nawr chungchangah hian sawrkarin theihtawp a chhuah sak thu te, an hlawh pawh April leh May pek tawh an nih thu leh, June leh a hnu lam atana an hlawh tur pawh chak taka ngaihtuah sak an nih thu hotuten thil awmdan vawi tam tak an hrilhfiah tawh thu te a tarlang. Heti chunga an nawrhna an kaltlangpui leh ni 14.7.2022 atanga tiam chin awm lova nawrh chhunzawm an tum chu sawrkarin pawi a tiin a hrethiam lo takzet tih a tarlang bawk.

"Damlote leh mipui tawrhna a zual zel loh nan NHM hnuaia thawktute chu ni 14.7.2022 atanga dan pangngai a an hna chhunzawm theuh tura lo hriattir tura ngen i ni a, hna zawm lo an awm a nih chuan an chungah sawrkarin dan angin hma a la ang, an hna an zawm ngei em tih report rawn thehlut tura hriattir i ni bawk e," tiin NHM, Mission Director hnena Health department Under Secretary in lehkha a pek ah chuan tarlan a ni bawk.