ZALEN December 16, 2024 : Rural Development Department chuan ni za inhlawhna lak har chungchangah mipui te hnena ngenna leh hriattirna a siam a, tun tuma Ni 100 inhlawhna lak har a nih chhan chu Mizoram sawrkar thiam loh ni lovin central lama hlawh siamtute technical lama harsatna an tawh vang niin an sawi..

Rural Development Department chuan MGNREGS hnuaia mipuite inhlawhna chu thla 2 mipuiin an dawng tawh lo a. Mipui inhlawhna te hi Mizoram Sawrkar kaltlang lo in Direct-in mipui Account-ah a lut thin a. Central Sawrkar hian Dec ni 5 khan mipuite hlawh tur hi Release Order a issue tawh a. Amaherawh chu Central Ministry lama a pawisa ber pe chhuaktu ber Pay and Accounts Office lam te’n technical issue an neih avangin vawiin thlengin mipuite inhlawhna an Account-ah a la lut thei lo an ti.

Mizoram sawrkar-a Rural Development Department chuan, "Mizorama thawktute chuan mipuite’n an thawh zawh atanga ni 8 chhungin an hlawh tur siamfelin tihfel ngaite an tifel nghal zel a. Mahse, tun tum harsatna hi chu Central Ministry lama pawisa pe chhuaktute lamah khawl lama harsatna an neih vang a ni a, in biak pawh reng a ni a, reilote-ah siam zawh an in bei sei a ni. Mipuiten harsatna an tawh avangin Sawrkar chuan pawi a ti takzet a, an harsatna sukiang turin theihtawp a chhuah mek a, mipuite lo dawh hram hram turin kan in ngen a, Krismas hmaa Mipuite Account-a a luh fel hman vek beisei a ni e," an ti.