ZALEN December 17, 2025: Viksit Bharqat Guarantee for Rozgar & Ajcevika Mission (Gramin) – VB G RAM G Bill chu nimin khan Lok Sabha-ah pharh a ni, hei hi MGNREGA thlakna tura duan a ni a, Opposition party te chuan hei hi an duh lo hle niin MPCC chuan vawiin khan thuthar thehdarhtute hmaa an sawi.

Congress Legal Cell Chairman T.T. Zothansanga, Ex MLA chuan, "Kum 2005 a Man Mohan Singh-a hova Ni 100 inhlawhna dan siam, tun thlenga India ram puma hman hi thiah a, thlak tum a ni. Nimina Parliament-a Bill pharh a nih hian Opposition lam atangin sawiselna nasa tak a awm a, 2005-a MGNREGA (Ni 100 inhlawhna) pass a nih laia Party zawng zawngin lungrual taka an thlawp hi a la tha tawkah an ngai a, fing tak leh thiam taka duan, BJP ten a aia dan thalo leh mipui nekcheptu tur hi thalo an ti a ni," a ti.

Bill tharah hian hnathawh hun hi Ni 100 atanga 125-ah a tisang a, mahse an thawh kim loh pawhin Right anga Claim theih a ni tawh dawn lo a. State liante chuan 40% an tum theih loh tur thu an MP-te kaltlangin an sawi nghal a ni, an ti.

T.T. Zothansanga chuan BJP Sawrkar hian India rama thil tha tak tak lo ti tawhtu leh inpumkhatna lo thlen tawh tute hmalakna hi zawi zawia nuai reh a, anmahni hmalakna anga kal tir zel hi an tum a, tuna ni 100 inhlawhna pawh hi kum 2005-a Congress Sawrkarin a ruahman, kum 20 zet hlawhtling taka lo kalpui tawh a ni a, kum 15 chhunga lo hlawkpui tawh pawh kha mihring Billion 31 zet niin, Rs. Vbc 6400 zet lo sen tawhna a ni. Congress bul lo tan tawh a nihna hi tireh turin a hming hi thlak danglam a, nakin hnua an tih ang taka lantir an tum a ni, a ti.

Congress Legal Cell Chairman chuan, "Mahatma Gandhi hi India hnampa a ni a, Direct takin an sawisel ngam lo. Mahse zawi zawia a hming tih reh hi an tum em em a ni. Mahatma Gandhi hi kum 1924 khan Congress President lo ni tawh a ni a, a ho hian India zalenna kan hmu a, heti chung hian BJP-te hian a Congress nihna lai kha hmu lianin, thiam takin a hming daihna tur hian hma an la chho zel tih hi a chiang em em a ni. MG tih lar aiin Rama tih lar hi an duh a, MGNREGA tih pawh VB G RAM G-in an thlak dawn a ni," a ti bawk.