ZALEN February 14, 2026: MPCC buatsaihin vawiin khan BJP sawrkarin thingtlang mite eibel Ni 100 (MGNREGA) inhlawhna tih tawp a tum dodalna Street Campaign Champhai Bazar puiah neih a ni. 

He huna thusawitu, Dr. Lallianchhunga, Spokesperson MPCC chuan, BJP sorkar hian ni 100 inhlawhna hi tuna aia tha zawka an siam duh a nih chuan India Hnam Pa, Mahatma Gandhi hming tibo kher lo leh Hindu pathian hming zep tel kher loin an siam tha thei a. Tuna an chet dan hi chu tharum thawhna dodal a, inngeih leh inrem taka India mite nunho duhtu Mahatma Gandhi thah nawn lehna a ni, a ti.

Dr. Lallianchhunga chuan, mithiamte’n Mizoram chhunga Ni 100 inhlawhna an zir chianna atangin MGNREGA hian thingtlang mipuite ei leh bar dinhmun a chawikang a, Kohhran thawhlawm a pun phah a, an fate sikul fee a tum a, electric bill a tum a, thingtlang khuaa hmasawnna ruhrel 47.2% lai hi Ni 100 Inhlawhna atanga siam a ni; chhungkaw tam takin MGNREGA hi innghah nan an hmang a, a scheme hi tawp ta thut se, Mizorama chhung thingtlang khuaa cheng chhungkaw 62.31% laiin harsatna an tawk tura ngaih a ni, an ti.

G RAM G an tiha Ni 125 Inhlawh theihna tur an sawi hi Mizoram sawrkarin Job Card neitute hlawh tur 10% State Matching Share a tum ve theih loh chuan tihpuitlin theih a ni dawn lo, tih sawiin Dr. Lallianchhunga chuan, "Ni 100 inhlawhna hi ZPM sawrkar hnu kum 2 chhungin Ministry of Rural Development in Ni 100 tling inhlawhna a rawn pe tawh lo va. 10% State Matching Share pek an huphurh avangin ZPM sawrkar hnuah CSS engemaw zat a tawp tawh nghe nghe a, CSS hnuaia thawk Mizo ṭhalai engemaw zatin hna an chân tawh a ni," a ti.

Dr. Lallianchhunga chuan Kristian te tana runthlak ber chu G RAM G hnuaia inhlawhnaah an tel ve duh chuan emaw, mipui hriat tur Tlang Au-naah Hindu pathian hming an lam tel zel a ngai tawh dawn a ni, a ti a.

He hunah hian Dr. Lallianchhunga chuan, "Champhai khawchhung leh a chhehvel kawng chhe lutuk chu enkawltu sawrkar leh MLA nei lo ang mai a ni. Champhai College-a zirtirtu (Lecturer) thenkhat an hna atanga ban tura hmalak pawh Champhai leh khawchhak mipui ten Champhaia Mizoram State University (MzSU) Eastern Campus dah tura sawrkar an ngen palzutna dik takah ngaih theih a ni," a ti bawk.

Ni 100 Inhlawh tih tawp duh lohna Street Campaign hi Champhai North Block President Lalhmingthanga chuan a kaihruai a ni.