Aizawl: Ni za inhlawhna tia hriat lar, MGNREGA ah nikum 2016-2017 chhung khan ni 52 inhlawh a ni a, kumin ah chuan hei aia tam hi inhlawh theih beisei a ni. Nimin khan Rural Development Minister R.Lalzirliana chuan Aijal Club ah Press mite kawmin RD Department hmalakna hrang hrang leh tunhnaia department in lawmman an dawnte Press mite a hrilh. Minister chuan, "Kumin 2017-2018 a ni za inhlawhna atan Mizoram chuan nuai 13449 a dawng tawh a, state matching share nuai 238.34 pawh a dawng tawh a. He sum hmang hian ni 31 inhlawhna kan siam theih phah a, tunah hian 2nd installment pawh kan claim leh thei tep tawh a ni," a ti. Minister chuan 1st April 2017 atangin Ministry in hlawh semna atan EFMS payment system a ngiat nia sawiin direct benefit transfer pawh Mizoram sawrkar chuan a hlen ve thei tep niin a sawi bawk. RD Minister chuan IAY/PMAY-G hna Mizoram in a thawh that avangin Gold Award lawmman leh SPMRM ah te a thawh that avangin lawmman a dawng tih sawiin, "Lawmman kan dawn theihna chhan hi Department thawktute tan hona leh thawhhona that vang a ni a, tehfung hrang hrang enin state lian zawkte tluklo awm tak kan nih laia hetiang lawmman kan dawng hian min tilawm hle a ni," a ti. IAY/PMAY-G hi mirethei insak tanpuina a ni a, he scheme hnuaiah hian kum 2015-2016 chhungin in 870 sak a ni a, kum 2016-2017 chhungin in 1796 sak a ni a. He scheme a lawmman Mizoram in a dawn chhan hi sum hmanthat vang leh hnathawh chak vang a ni. SPMRM hi hmasawnna hna thawh tur, sum indaihlohna phuhrukna atan hman thin a ni a. He scheme ah hian Mizoream chu India ram state zinga hmang tha ber dawttu a ni. RD Department hmalakna dang sawiin Minister Zira chuan Mizoram Rural Livelihoods Mission kaltlangin district 6 ah hma lak mek a ni a, Self Help Group 2000 din a ni tawh a. IWMP hnuaiah project 73 kalpui mekin khua 249 a huam a. Border Area Development Programme hnuaia Block 16 ah nikum chhungin nuai 4600 hmuh a niin kumin ah nuai 5100 hmangin hna thawh leh tum a ni tih a sawi a. Rural Housing Scheme hnuaiah kumin hian nuai 470 hmangin mirethei te inchung tur rangva lei leh an tum niin a sawi.