ZALEN September 12, 2024 : Mizoram Youth Commission, Lynchpin leh ZALEN tangkawp ten an buatsaih School Connect 2024 chu vawiin khan MYC Chairman Malsawmzuala Ralte chuan Chanmari YMA Hall-ah a hawng a, mi hlawhtling ni turin T5 - taimak, tumruh, tei rei peih, thawhrimna leh time table neih te a pawimawh tih a sawi. School Connect hi naktukah chhunzawm leh a ni ang.

Malsawmzuala Ralte chuan zirlai kalkhawmte chu IG-a follower ngah ber, FB-a thil post te, reels siamte like tu tam tih vel tuipui hlauhawm thu a hrilh a. Hetiang hian awmzia a neih loh thu leh hlawkna a awm loh thu a sawi.

MYC Chairman chuan "MYC-in hian coaching class tha tak kan kalpui mek a, district dangah te pawh kalpui a ni. Mahni kea ding a, sum leh pai leh mamawh dang thawk chhuak turin T5 - taimak, tumruh, tei rei peih, thawhrimna leh time table neih te a pawimawh a ni," a ti.

"Tunlaiah competition a sang tawh em em a, T5 nena beih loh chuan hlawhtlin a harsa tawh lutuk. Tih ve mai mai, school kal ve tawp, tuipui dang neih truai te maw...zirlai kan nih ang a, kan duty ve chu tha taka zir, thuawih, career plan mumal tak neih a ni. Chu chu puitlinna leh hlawhtlinna kawng, Pathian malsawmna dawn theihna a ni," a ti.

MYC Chairman chuan Zirlai te chu Ei leh in, silhfen, in leh lo leh chhungkaw mamawh dang anmahni ngeia inngaihtuah a tul hun a lo la thleng dawn tih a sawi a, chumi atan chuan School Connect programme hi a pawimawh hle dawn a ti a. Nih tum la nei lo phei chuan vawiin atang hian nih tum an neih a, an thlan fel ngei a duhsak thu a hrilh. School Connect programme chu hma lam hun a an kawng zawh tur, nuna hlawhtlinna sang tak an neih theihna tura kawhhmuhtu a nih ngei a beisei tih a hrilh bawk.

School Connect hawnna hun hi ZALEN Editor Vanlalrema Vantawl chuan a kaihruai a, School Connect 2024 buatsaih a nih chhan a sawi a, he hunah hian institution 12 bakah sawmbik Womens Polytechnic leh ITI, Aizawl te an tel thu leh he hun chhim tur hian school pariat sawm an nih thu a sawi. He event hi zirlai ta anih angin zirlaite huangtau tur leh zak lo thei turin a chah a. An duh ang zawt mawlh mawlh tur leh, hun bituk awm mah se, an thu ber tih hria a, Stalls te tangkai taka hmang turin a chah. He hunah hian mithiam ten zirlai te an hmalam huna an kal dan tur zirtirna an pe a ni.