Zudio LPS Pro Fight 2024 tan hun tura ruahman tawh sawn tlai hretin, November 1 zanah LPS Arena, Falkland-ah inhnek tanin December kar hmasa ber thleng a awh ang.

October 28 zana tan tura puanzar tawh a nih laiin LPS Arena hman chungchang leh remchan zawkna avangin ni liin sawn hlat a ni a, Mizoram chhung leh pawn atangin kum 17 atanga kum 40 inkar a duh apiang, mahni sensoin an tel theih.

Thawhtanni atangin LPS Office, Zarkawtah tel tur tan entry form pakhat Rs 10 zelin a lak theih dawn a. Nikumah boxer 281 telin kuminah eng zat nge inlan dawn hriat la ni lo mah se Organising Committee chuan kum kal ta aia tam an nih a beisei a, chutih rualin December kar hmasa ber thleng championship awh turin ruahmanna a siam lawk a ni.

Pro Fight vawi 11-na neih a ni dawn tih puanzar a nih hnuah Mizoram chhung mai ni lovin India ram state dang atangin ngaihven an awm a. Kum dangah thenawm state atanga tel an awm fo tawh a, tun tumah hian Andaman and Nicobar Island atangin boxer eng emaw zatin tel an tum tih an sawi a, tih chian erawh a la ni lo.

Weight hrang panga fly (kg 48-52), bantam (kg 52-56), light (kg 56-61), welter (kg 61-67) leh middle (kg 67-74)-ah title an inchuh dawn a, mi mal chawimawina tel lovin lawmman pawisa fai Rs 6,50,000 sem chhuah a ni ang.