ZALEN July 28, 2026 : Mizoram Govt. Adhoc-Aided High School Teacher’s Association (MIGAHTA) te chuan ni 6 chhung sawrkar laka lungawi lohna an lantir hnuah naktukah Vanapa Hall kawtah Peaceful Sit-in Demonstration an nei dawn.

MIGAHTA thuchhuahin a tarlan danin kum 2023-a Provincialised an nih hnuah "Power to Relax" clause awm loh avanga Provincialisation tih tawh paih thlak (revoke) leh an ni chu dik lo an ti a. Council of Ministers meeting-in a lo pass tawh ang ngeiin an dinhmun ngai Provincialised-a dah let turin sawrkar an phut a ni an ti.

Adhoc Grant-in-Aid School-te chu Lumpsum Grant-in-Aid dinhmuna dah let tum chu an pawm thei loh thu an sawi a, sawrkara an dilna leh ngenna ten awmzia a neih loh chuan na zawka hma lak chhunzawm zel tum an nih thu thuchhuah chuan a tarlang.

Mizoram puma Adhoc High School 90 chuanga zirtirtute hian July 21 leh 22 ah khan badge dum campaign an hmang tawh a, July 23 leh 24-ah No Teaching Day an kalpui bawk a. July 27 leh 28-ah Mass Casual Leave an la a, school tam tak zirna a khaihlak a ni.

Picture - File pic