Aizawl March 16, 2023 : Commere and Industries changtu Minister Dr R. Lalthangliana chuan vawiin khan SELCO Foundation buatsaih Mizoram mamawh Ni zung chakna khawl hman tangkaina tura rahbi pawimawh Mizoram Trade Facilitation Fair 2023 chu a hawng a, he hunah hian In chhungkhura hman mai theih chi leh eizawnna atan hman tur khawl te chhawpchhuaha a ni.

He hawnna inkhawm Millennium Centre a buatsaih ah hian Commerce and Industries Minister Dr. R. Lalthangliana chuan Mizoram mamawh Ni zung chakna khawl hman tangkaina tur a rahbi pawimawh tak Mizoram Trade Facilitation Fair buatsaih a ni chu lawmawm a tih thu a sawi a. Mizoram-in kum tina kawlphetha chawk luh nana sum hman thahnem tak chu Ni zung chakna a siam khawl chi hrang hrang hmanga phuhruk anih chhoh zel a beisei thu a sawi. Lo nei mi te pawhin trade fair a an chhawp chhuah khawl, hman awlsam tak tur chu an tangkaipui ngei a rin thu a sawi bawk.

Minister chuan Ni zung chakna hmanga kawlphetha siam chu thil dang nen a tehkhin chuan sum ngai tur a tlem zawk mai bakah tuihna tha leh boruak thianghlim kan neih theih zelna tur ram thing leh mau te humhalhna kal mek nen a inmil tak anih avangin ngaih pawimawh zual a ngai a ni, a ti.

Mizoram Trade Facilitation Fair 2023 hi SELCO Foundation, Planning Department, North East Initiative Development Agency leh Mizoram Science, Technology and Innovation Council tangkawp in ni hnih chhung awh tura an buatsaih a ni a, Solar Technology hmanga siam khawl chi hrang hrang chhawp chhuah a ni a. Lo nei mi te, Nabard hruaitute, Mizoram chhunga entrepreneurs te leh sawm bik te an kalkhawm a ni.