Aizawl: Nikum 2022-23 chhung khan Godrej Oil Palm Mill, Bukvanneiah oil palm rah nuai 600 man hu lei a ni.

Kolasib District Oil Palm Growers’ Association-ten Zirtawpni kaltaa inkhawmpui, Kolasib Diakkawn YMA Hall-a an neihah he thu hi tar lan a ni a. Godrej Agrovet Ltd. Senior Executive Lalruatkima sawi danin kum 2022-23 chhungin Palm Oil Mill, Bukvanneiah oil palm rah Rs. nuai 600 man hu lei a ni a, hemi kaihhnawihah hian thalai thahnem tak tan inhlawhna siamsak a ni tih a sawi.

Kolasib district chhungah chhungkaw 278-in oil palm an ching mek a, mumal taka a rah hralh thei hi chhungkaw 182 an awm mek bawk.

Oil palm chingtuten kum 2022-23 chhungin oil palm rah metric ton 1,870 chu company-te hnenah hralh chhuak tawh anga chhinchhiah a ni.

Inkhawmpuia khuallian, Agriculture Secretary J.Hmingthanmawia chuan oil palm avanga sik leh sa leh ram leilung hausakna a chhe zawnga nghawng awm thei anga sawi thinte zirchiang turin Mizoramah Pilot Research Studies kalpui mek a nih thu a sawi a. Oil palm rah hralhna mante pawh ennawn zel a nih avangin kuthnathawktute tan innghahnatlak leh rintlak a nih thu a sawi rualin Mizoram chhim lama oil palm rah lei turin Patanjali Foods Ltd. te changtlung zawka inbun turin ruahmanna kalpui mek a nih thu a sawi.