ZALEN, November 30, 2025: Nikuma vawi ruk intlansiaka dawhsan vawi li lawn thei, Shaun Lalremruata Chhangte chuan MRF MoGrip Supercross National Championship 2025-ah pawh Mizoram tihmingtha lehin a round zawna dawnsan lawnin nomawi pahnih a la leh ta.

Zudio, Navelim, Goa-a Pathiannia championship Round 5 intlansiakah Mizo tlangval hi Private Expert Class-ah 2-na niin dawhsan a lawn leh a, tun season-a a vawi hnih dawnsan lawnna a ni ta.

November thla tira Raipur, Chhattisgarh-a Round 4 intlansiakah khan a mi mala Mizorama tel, Shaun-a hi Private Expert Class-ah pahnihna a lo ni tawh bawk.

Goa-a inelnaah hian factory bike chakho nena an intlansiakna, Indian Expert Class-ah 5-naah a thleng bawk.

College Veng, Aizawl tlangval hi Thawhlehniah Mizoramah a haw ang a, tun season-a intlansiak hnuhnung ber tur chu February, 2026-ah an tlan leh ang dawn a. Lawmman a la thei chu Pathian vang chauh a nih thu sawiin amah lo tana tawngtaipuitute chungah lawmthu a sawi bawk.

Kum 24 mi, Shaun-a hi tun season-ah hian round hmasa pathum - Vadodara, Gujarat; Coimbatore, Tamil Nadu leh Nashik, Maharashtra-ah a lo inlan tawh a. Round hmasa lamah hian lawmman dawng phak lo mah se Round 4 leh 5-ah a dawng phak ve ve ta a ni.

Shaun-a hi hetiang inelnaa Mizoram atanga tel awm chhun a la ni a, nikuma a tel khan Bhopal, Madhya Pradesh-a intlansiakah Private Expert-ah pahnihna niin Pune, Maharashtra leh Bengaluru, Karnataka-ah pathumnaah a thleng ve ve bawk.