ZALEN, November 10, 2025: Nikuma vawi ruk intlansiaka dawhsan vawi li lawn thei, Shaun Lalremruata Chhangte chuan MRF MoGrip Supercross National Championship 2025-ah pawh Mizoram tihmingtha lehin dawhsan a lawn leh ta.

India ram hmun hrang hranga kawng rualrem lova bike intlansiakna, MRF MoGrip Supercross National Championship 2025 Round 4-ah College Veng, Aizawl tlangval hian Pathianni khan Private Expert Class-ah pahnihna niin dawhsan a lawn leh a. Indian Novice Class-ah erawh dawhsawn lawn pha lo chiahin palinaah a thleng thung.

Raipur, Chhattisgarh-a an intlansiak hma hian mi mala Mizoram atanga tel, Shaun-a hi round thumah a lo inlan tawh bawk a. Vadodara, Gujarat-ah Round 1; Coimbatore, Tamil Nadu-ah Round 2 leh Nashik, Maharashtra-ah Round 3-ah a inlan tawh.

Raipur-a an intlansiak hma hian a bike engine a chian loh deuh avangin dawhsan lawn phak beiseina chau deuh mah se amahin a tum em avangin stock engine hmangin a tlan lui a, lawmman la phaka thain a tlan ta thung a ni.

Bike chak tak tak kara lawmman a la thei chu Pathian vang chauh a nih thu Shaun-a hian a sawi a. Amah buaipuitu leh lo tana lo tawngtaipuitute chungah lawmthu a sawi bawk.

Kum 24 mi, Shaun-a hi hetiang inelnaa Mizoram atanga tel awm chhun a la ni a, nikuma a tel khan Bhopal, Madhya Pradesh-a intlansiakah Private Expert-ah pahnihna niin Pune, Maharashtra leh Bengaluru, Karnataka-ah pathumnaah a thleng ve ve bawk.

Shaun-a hian November thla tawpah Vishakhapatnam, Andhra Pradesh-ah Round 5 leh kum tharah Round 6 tlan leh tur a la nei a. Hemi hma hian Thawhlehniah a haw phawt ang a, a kal tha leh dawn a ni.