ZALEN August 6, 2023 : Mizoramah nikum chhung khan Medical Certification Causes of Death (MCCD)-a thi mi 4,064 chhinchhiah a ni a. Thihna thleng zingah kawchhung lam tha lo vanga thi an tam ber. Nikum chhunga mitthi zawng zawng atanga chhuta mipa thi zat chu 64.30% a ni.

Economics & Statistics department in 'Annual report of Registration of Births & Deaths Mizoram 2022' a tihchhuah atanga a lan danin kum 2022-ah naupiang 26049 awmin an zinga 13150 hi mipa an ni a, 12899 chu hmeichhia an ni. Nikum chhung vek khan Mizoramah mitthi 8584 awmin an zinga 5520 hi mipa an ni a, 3064 hi hmeichhia an ni thung. Nikum chhunga mitthi zawng zawng atanga chhuta mipa thi zat hi 64.30% a ni.

Kum 2010 atanga MCCD chhinchhiah danin kumtin hmeichhia aiin mipa thi an tam a, data tarlan danin hmeichhia aiin mipa hi a let dawnin thi an tam zawk zel a ni.

Covid vanga thi hi kum 2022 ah 139 awmin 2021 ah 390 an awm a. Kum 2021 ah hian Covid-19 hi thihna thlentu pathumna a ni phak a, 2021 a mitthi zawng zawng atanga chhutin 10.4% a tling a ni.

Directorate of Economics & Statistics-in Mizoram chhunga damdawi in hrang hrang - sawrkar, private, UPHC, CHC, PHC leh tual chhunga thi leh piang chhinchhiahtu (Registrar of Births & Death thenkhat) 112 ten thihna chhan an lakkhawm leh an thih dan an chhinchhiahna, ‘Medical Certification Causes of Death 2022’ atanga a lan danin nikum chhung khan damdawi in hrang hrangah mitthi 4,064 chhinchhiah a ni a, heng zinga 2,657 chu mipa niin hmeichhia 1,407 an awm.

Mi thiamte chhinchhiahna atanga a lan danin thihna thleng zingah hian kawchhung lam tha lo vanga thi an tam ber a, thihna thleng zawng zawng atanga chhutin kawchhung lam tha lo (digestive system) vanga thi hi mi 724 awmin hei hi mitthi zawng zawng atanga chhutin 18% an tling a ni.

Kawchhung tha lo vang thi zingah thin tha lo vanga thi mi 560 an awm a, thin tha lo vanga thi an tam chhan hi zu kaihhnawih vang te, toxic, hepatitis, thin ro (cirhosis) te niin an tar lang. 

Thisen zam tha lo vanga thihna (circulatory system) 16% leh Thawkna lam harsatna (respiratory system) vanga thi an tam bawk.

Thihna thlentu lian langsar dang leh chu hri leng chi hrang hrang vanga thihna a ni a, he natna hmang hian mi 414 (15%) an thi nia chhinchhiah a niin he natna hian cholera, typhoid, santen, TB leh rannung seh hmanga natna te a huam a ni. Cancer (Neoplasms) vanga thi mi 374 (9%) an awm nia chhinchhiah a ni bawkin hei hian pumpui hnun, pumpui, ril, thin leh cancer dang te a huam a ni.

ZALEN zawhna chhangin Economics & Statistics Department thawktute chuan data an lakkhawm hi World Health Organisation (WHO) in ruahmanna a siam anga mithiam ten an thihchhan an ziah niin an sawi a. Mizorama mitthi zawng zawng an thihchhan an chhinchhiah vek thei lo tih sawiin damdawi ina inenkawl leh thi te chauh MCCD ah hian an thih chhan tarlan a ni tih an sawi a. Doctor pakhat chuan thin thalo vanga Mizorama thihna a tam chhan chu zu in nasa leh hemi kaihhnawih natna a tam vang niin ZALEN a hrilh bawk.