December 1, 2023; Mizoram Presbyterian Kohhran chuan nakum 2024 atana Nilai leh Beihrual Thupui zirlaibu tur chu a tichhuak ta a, Synod Bookroom Branch Distribution Center-ah te lei theiha chhawp chhuah a ni ta.

Nilai leh Beihrual Thupui bu hi Mizo lehkhabu malkhaiah Puitling Sunday School zirlaibu tih lovah chuan copy chhut chhuah tam ber a ni a. Copy 70,000 zet chhut a ni.

Nakum 2024 hian Mizoram Presbyterian Kohhran chuan Nilai leh Beihrual Thupui-ah “Kristiante Mawhphurhna” tih an zir dawn a. Presbyterian Pastor-te zinga mi thiam leh tawn hriat ngah, Missionary Training College-a Principal leh Synod Secretary hial lo ni tawh Rev. Vanlalrova Khiangte ziah a ni.

Tun tum Thupui bu hi phek 220 zeta chhah ni mahse Rs. 140 chauha hralh chhuah a ni a. Mizoram puma Synod Bookroom dawr zawng zawngah lei theih tura chhawp chhuah mek a ni. Mizoram Synod chuan Nilai leh Beihrual Thupui bu hi Kohhran Upa leh Pastor-te'n a thlawnin a pe thin a, nakum pawh hian an dawng leh thei dawn bawk a ni.

2024 Nilai Leh Beihrual Thupui Bu bakah Synod Calendar, phek khat chi leh a keu chi peih fel a ni ta a, kumtin Synod Calendar phek mal chi-ah hian Synod Statistics pawimawh tarlan tel thin niin Rs. 20-a lei theih a ni ang a, a keu chi ah hian thlalak hmuhnawm tak tak dah niin Rs. 70/- a lei theih a ni thung ang. Kristian Diary leh Puitling Sunday School zirlaibu thar pawh tichhuah tawh a ni a Naupang Sunday School zirlai bu thar pawh tih chhuah kim a ni ta bawk.