Mizorama tual chhung football inelnaa ngaihhlut leh ngaihven hlawh ber tia sawi ngam, YMA branch hrang hrangte inelna chu Ningani atangin khelh tan a ni leh dawn ta a, Thawhlehni zan hian pet hawn a ni ang.

Central YMA leh Mizoram Football Association (MFA) buatsaih intihsiakna, LBS SUZUKI 21st Inter-branch Football Tournament 2023-ah hian YMA branch 145 an inel dawn a, Aizawl leh a chhehvela khelmual parukah khelh a ni ang.

RG Stadium, AR Lammual, Muallungthu Ground leh Lengpui Ground bakah MAP Ground, Armed Veng leh MFA Ground, Sairang Dinthar-ah te Mizo footballer 3,600 chuang an inel dawn a ni.

Thawhlehni zanah hian tournament hi Vanapa Hall-ah Ngurdingliana, LBS Suzuki-in a pet hawng ang a. Fixture tlangzarh nghal tur niin R.Lalrinmawia, Chairman, Organising Committee-in a tlangzarh ang.

Pet hawn zanah hian R.Lalngheta, President, Central YMA leh Lalnghinglova Hmar, Hon Secy, MFA te pawhin thu an sawi dawn a. Mizo football legend S.Malsawmtluanga, MFA ambassador ni bawk hovin oath taking neih a ni bawk ang.

Inter-branch YMA football hi khelh a nih apiangin ngaihven a hlawh em em ziah a. Nikumah khan final-ah Champhai Vengthlang Branch-in Sialhawk Branch hnehin an champion a, Sialhawk auhla thenkhat phei chu Mizoram puma khawtual tawng lar takah a chang zui phah hial a ni.