October 20, 2023; Nl Lalhmachhuani (Mimi) chu Independent in Aizawl East II ah a ding dawn a, vawiin ah nomination a thehlut.

Nomination a file zawh a thuthar thehdarhtute zawhna chhangin Nl Mimi-i chuan a dinna tur chu Zo Re-unification Movement (ZRM) aiawhin Independent a nih thu a sawi a, symbol ah 'Tawtawrawt' a hmang dawn tih a sawi. "ZRM aiawh a independent a ding tur a inpe midang pawh an awm nual a, mahse keima'n ZRM ai ka awh dawn a ni," a ti bawk.

Zawhna chhangin Pathian zarah a tlin ngei a beisei tih a sawi a, chunglam hriattirna avang a ding tur a nih thu te, East II a ding tur a hriattirna a dawn thu te a sawi.

Mahni a ro inrel (Independent Nation) chu an tum ber a ni tih sawi bawkin, a tling a nih chuan chu chu au chhuahpui ngei a tum dawn thu a sawi a, chumi tur atan chuan Zofate inpumkhatna tur atana hmalak chu an ngaih pawimawh berte zing a mi a nih dawn thu a sawi bawk.