Aizawl: MNF Vice President Dr. R.Lalthangliana chuan, “Zoram mipui hi NLUP hlawhchhamzia hre chiangtute kan ni a, a dawngtu tamzia ngaihtuah chuan hlawhtlinpuitu nia an sawite hi kut zungtang thliaka chhiar tham lek chauh an ni,” a ti. Nimin Zawlnuam Thuampui veng Information cum Cultural Centre-a SEDP zirhona leh inhrilhfiahna hunah he thu hi sawiin Dr. R.Lalthangliana chuan, “Congress sawrkar hian kum 1998 MLA inthlan dawnah cheng hnih pe a, sawrkar tuka cheng nuai(h) khat sem turin an inzuar a. Sawrkar tuka sem chu sawi loh, kum 2011 ah mi tlemte hnenah tlemte tein an sem tan thei chauh a. Kum 10 chhung hian din chhuahpui tham loh, instalment-in cheng sing hnih khat lek lekin an pe kim thei tawk a. Chuvangin, inthlan kumah ‘NLUP kutpui’ siam an tum hi mipui bumna mai a ni,” a ti. MNF Vice President chuan, “Pathian leh mipui zarah MNF kan sawrkar ngei ang a, kan sawrkar tuk atangin hna kan tan nghal dawn,” a ti bawk.