Congress President Lal Thanzara chuan, “Kan chief minister hi kan NLUP min sawi mawipuitu tha a ni thin a, a awmna azira a thusawi a danglam thin vang maia tuna a sawi dan thlak leh a ni,” a ti.

Zirtawpnia an party-in Friday Political Session an hmannaah Mizoram Congress chief hian ro an rel chhunga an flagship programme, NLUP chungchang hi a sawi chhuak.

“Kan NLUP kha ‘sum semna mai mai a ni’ tiin min sawi chhiatsak a. Kan sawrkar lai khan rangva inchung nei ngai reng reng loten rangva kan sem vangin an neih phah a, NLUP vangin tam takin puitling takin huan an neih phah,” a ti.

“Tuna kan chief minister (Lalduhoma) pawh hi kan NLUP min sawi mawipuitu tha tak a ni tih pawh Vanapa Hall-a a sawi kan hriat kha. Ani hi a awmna azirin a thusawi a danglam thin vang maia tuna a sawi dan thlak leh ta a ni,” a ti.

Patea chuan, “Kan sawrkar lai khan huan lo ram panna kawng km 2,500 chuang kan lai a. LPS Kuthnathawk Huang kan en pawh hian a tam zawk hi NLUP vanga hlawhtling a ni tih kan hmu,” a ti bawk.

PWD minister lo ni reng tawh, Patea chuan tun laia Mizoram chhung kawngpui chhia chungchang pawh sawiin sawrkarna lo chang tawh, Congress leh MNF party bakah rorel lai, ZPM party chu inelsen tur bik an awm lo niin a sawi.

Congress sawrkar laiin MNF-in an bei bei nasa a, kawngpuiah buhte an phun niin a sawi a. MNF an sawrkar hnuah an kawng chu a tha bik lo nia sawiin, thenkhatten elsen nan kawngpuiah sangha an chhuah niin a sawi.

“Tuna kan sawkar hrawn lai mek hian working season an tih, kum tir lamah kawng siam that ngaihtuah lovin hmalakna chang an hre lo va. Tunah phei chuan tuilet hnu a kawng chhiat ber tum kan thleng ta, a vanduai thlak hle a ni,” a ti.

Congress president chuan, “Sawrkarin kawngpui a khar hial ngai khawpin a chhia a, vai driver-ten min elsen a, min nuihzat mek a ni. Hnam dang, ringlo mi minister-in, ‘Hetiang khawpa kawng chhiate chu sawrkar hi court-a khin tlak a ni,’ min ti,” a ti.

“Mizote hi thil a nihna tak ngaihtuah lova tawngtaw insawi chhiat kan ching a, kawng chhiat chungchangah hi chuan party pathumte hian inelsen dan tawk kan thiam tawh ang chu maw?” a ti bawk.