Aizawl: NLUP Implementing Board sum puktute chuan an rul tha tawk lo hle a, sum puktu 5 zinga 3 phei chuan an la rul miah lo. Assembly neih mekah MLA Lalthanliana zawhna chhangin Agriculture Minister KS Thanga chuan NLUP sum puktu pawl 5 zingah Hnam Chhantu leh Samuel Tea Factory te chauhin sum hi an rul tih a tarlang a. Hnam Chhantu hian an sum puk nuai 230 atangin nuai 35 rul tawhin rulh loh nuai 195 an la nei a. LZ Bamboo Industry-in nuai 10 an lak atangin engmah an la rul lo a, nuai 30 puktu Mizoram Broom Industry leh nuai 50 puktu CDAR ten engmah an la rul lo bawk a. Samuel Tea Factory chuan nuai 57.77 an puk atangin nuai 2.2 rul tawhin rulh hmabak nuai 55.57 an la nei a ni. NLUP hlawhtlinna chungchang zawhna chhangin Agriculture Minister chuan NLUP hlawhtlinna chu Radiant Integrity Technosolutions Pvt.Ltd. Chennai ten an zirchiang mek nia sawiin zirchianna hi zawh fel a nih hunah a hlawhtlin dan a hriat chian theih dawn niin a sawi bawk.