Aizawl: Indian Medical Association Vice President Dr. Rajendra Airan chuan, “NMC bill hi kan duh lo a, katlangpui a nih chuan kan hnathawh kan chawlhsan ang,” a ti. Nimin chhun khan Aijal Club-ah chanchinbumite kawmin IMA Vice President chuan sawrkar laipuiin National Medical Commission bill siam a tum chu an duh lo tih a sawi a, “NMC bill hi mi tlemte hnena thuneihna inpekna te, mi retheite harsatna thlentu leh hausate invulh lenna tur a nih avangin sawrkarin a kaltlangpui lui a nih chuan IMA chuan kan hnathawhte kan chawlhsan dawn a ni,” a ti. IMA Vice President chuan Aizawl a khawmpui an buatsaih chhan chu an pawl tihchak lehzualna atan leh hmarchhak biala an member-te tihchakna tur a ni tih a sawi. Zawhna chhangin hmarchhak bialah Mizoram leh Arunachal Pradesh ten medical college an la neih ve loh avangin an neih ngei theihna atan IMA chuan hmalakpui an tum tih a sawi bawk. IMA hruaitute sawi danin tuna Doctor te chunga thuneitu Medical Council of India ah hian state hrang hrang ten an aiawhtur Doctor pakhat an tirh theih bakah thlanchhuah te nen mi 135 vel an awm thu sawiin hei hi sawrkar laipuin chuan thia tin mi 25 awmna National Medical Commission din a tum a. NMC-ah hian Doctor-te atangin mi 5 chauh awm thei tura tih anih avangin a him lo a, chubakah Medical College ten fee an tihsan dawn avangin mi retheiten harsatna an tawk dawn nia sawiin Doctor-te an pass chhuah tawh hnua exit exam buatsaih chu harsatna thlentu niin an sawi bawk. Thudawn danin National Medical Commission bill hi sawrkar laipui chuan Parliament a pharh tura a tih zet tawh hnuah tiamchin awm lovin a hnukkir leh a ni. Indian Medical Association (IMA) hi India rama doctor intelkhawm pawl lianber, member nuai 3.2 vel leh branch 1750 chuang awmna pawl a ni a. He pawl hian doctor te welfare leh an harrsatna kawng hrang hrangte leh medical science lama than zelna te a ngaihtuah a ni.