ZALEN August 8, 2023 : MNF chuan, "Kan ram leh hnam, kan sakhua himna hi a ngaih pawimawh ber a nih avangin Parliament session kalmek a sawrkar rintawk lohna (No Confidence Motion) eptu party ten an putluh hi huai takin a thlawp dawn," an ti.

MNF thuchhuak chuan, "Sawrkar laipuiin Manipur tualchhung buaina a chinfel theihloh avanga eptu party tangrual ten Lok Sabha session neih mek a, 'No Confidence Motion' an put luh chu debate neih mek a ni a, hemi chungchang ah hian Mizoram chhunga eptu party thenkhat te’n mipui rilru hruaikawi theih beisei a thudiklo an vawrh darh hi Mizo National Youth Front (MNYF) Headquarters chuan pawi a ti. Thudiklo hmang a mipuite bum hreh lo political party kan la awm hi Mizo kan nihna ang pawhin a zahthlak hle," an ti.

MNYF Headquarters chuan ,"India ram rorelna in sang, parliament monsoon session neih mek a sawrkar rin tawk lohna ‘No Confidence Motion’ lut hi August ni 8 atanga ni 10 chhungin parliament house-ah sawiho tur a ni a, No Trust Motion debate hi neih tan chauh niin Prime Minister pawhin motion reply a la neih loh bakah; vote lakna a la awm lo a ni. Hetiang a nihlai a Congress leh ZPM party ten mipui rilru hruaikawi tum a, 'MNF MP te'n BJP an thlawp' tih thudiklo mipui hnena an thehdarh hi tenawm kan ti hle a ni," an ti bawk.

Sakhaw tana pawi thei turah chuan NDA emaw, BJP emaw pawh nise a do ngam tih sawiin, "Kan ram leh hnam, kan sakhua himna hi a ngaih pawimawh ber a nih avangin eptu party tangrual in Lok Sabha session kalmek a sawrkar rintawk lohna (No Confidence Motion) an putluh hi MNF chuan a thlawp dawn tih zoram mipui hriat ah kan puang a. Kum 20 chhung silai hmang a India sawrkar lo do ngam tawh Pu Zoramthanga kaihhruai MNF hian kan ram leh hnam, kan sakhaw tana pawi thei turah chuan NDA emaw, BJP emaw pawh nise a do ngam tih zoram mipui ten an hriat kan duh bawk a ni," an ti.