Aizawl: Co-ordination Committee on Traffic Management-in hun tiam chhunga garage nei lote tana hremna lekkawh dan tur rawtna lo siam tura a tih angin SP Traffic chuan garage neilo te chu Bawngkawn-Kulikawn tlangdunga tlan khap turin an rawt. Home Minister R.Lalzirliana hova Co-ordination Committee on Traffic thu khawm chuan Aizawl khawpuia lirthei neitute chu November ni 30,2017 hma ngeia garage nei turin a hriattir a, huntiam chhunga nei lote chunga action lak dan tur ruahmanna lo siam tura a tih angin siam a ni a. Garage nei lote chu zing dar 7 atanga zan dar 7 thleng Bawngkawn-Kulikawn inkar tlan phal loh nise tiin rawtna a siam a. Vawi khatna atan Rs. 3000 chawitir te, vawi hnihnaah Rs. 5000 chawitirin an la neih loh fo chuan an registration/driving license tihtawp rawt a ni. Hun tiam chhunga garage nei lote chu ni tin Rs.500 chawitir nise tih leh December 1, 2017 atang chuan Traffic, AMC,Transport leh Local Council ten an huam chhung kawngkama zanriak motor te hnuksawn thin se tih te a ni.