ZALEN, September 13, 2025: Pro Volleyball League champion nomawi nena season khar, Anastasia Electric Veng Volleyball Club chuan nomawi nen bawk season thar bul an tan a. Zirtawpni zana MSSC Golden Jubilee Celebration MVA Season Opening Tournament final khelhah group stage-a an hneh loh, Khawbel Volleyball Club lakah 3-1-a phuba lain nomawi an la leh.

An innghahna veng, Electric Veng, Aizawl, YMA Indoor Stadium-a final khelhah hian set hnihna an hloh tum tih loh a tir atanga a tawp thlenga chungnung tluanin 25-21, 17-25, 25-19, 25-15-in an chak.

Anastasia hian Nilainia group stage inkhel tawp berah Khawbel lakah hian 3-0-in an lo tlawm tawh a, an group-a a sang ber nih theih loh phah mah se final erawh a dang ta a, a tir atangin an chungnung.

Tournament tan tirh atanga mi mala che tha ber pawl, Khawbel spiker Johan Vanneihsanga chu final-ah hian an khaw club tan che chhe lo mah se lehlamah Lalruatsanga, Laldinsanga leh tawnhriat nei tha, captain Laldensanga leh zuang thei em em mai, Zomuansanga te an kawl a. An dang seng lo a ni.

Ruatsanga chu Best Spiker atana thlan niin Pro Volleyball League 2025 Best Setter, Ramdintluanga chu Best Setter atan thlan a ni bawk.

Zirtawpni tlaia hmeichhe final khelhah player tawnhriat nei tha rual tamna, Tuichangral Volleyball Club chuan Chhinga Veng Spikers lakah set hmasa ber hloh mah se chiai lova bei zuiin 3-1 (23-25, 25-19, 25-19, 25-18)-a lehthalin nomawi an la bawk.

Hemichhiaah hian Tuichangral spiker, Remlalnghaki chu Best Spiker-ah thlan niin Melody Lallawmkimi chu Best Setter-ah thlan a ni bawk.

Thawhtanni atanga Tuikual Indoor Stadium, Tuikual North, Aizawla inelnaah hian pro division-a mipa club pasarih awmah Thutak Nunpuitu Team (TNT) Volleyball Club tih loh inlan vekin hmeichhe team li an inlan kim bawk.

MSSC Golden Jubillee, MVA Season Opening Tournament 2025

Women’s Final 

Tuichangral VC bt Chhinga Veng Spikers

3-1 (23-25, 25-19, 25-19, 25-18)

Best Spiker - Remlalnghaki, Tuichangral VC

Best Setter - Melody Lallawmkimi, Tuichangral VC

Men’s Final

Anastasia Electric Veng VC bt Khawbel VC

3-1 (25-21, 17-25, 25-19, 25-15)

Best Setter - Ramdintluanga, Anastasia Electric Veng VC

Best Spiker - Lalruatsanga, Anastasia Electric Veng VC