Aizawl October 15, 2023 : November ni 7, 2023 a Mizoram MLA inthlanpui lo awm tura chuh tum te tan Zirtawpni atang khan nomination thehluh theih a ni a, he chanchin buatsaih lai thleng hian chuh tura hming pelut an la awm lo. Hetih lai hian vote chhiar ni atana Pathianni ruat a ni chu duh lovin a ni sawn turin political party leh NGO ten ECI ah ngen mah se, he thu buatsaih lai thleng hi chuan chhanna a la awm lo thung.

Thudawn danin inthlanna a chuh tum te tan nomination hi pisa kai ni chawhma dar 11 atanga tlai dar 3 inkarah thehluh theih niin, October ni 20, 2023 (Zirtawpni) tlai dar 3 thleng thehluh theih a ni ang. October ni 21, 2023 (Inrinni) ah Nomination paper tlingkhawmte hi enfiah a ni ang a, October ni 23 (Thawhtanni) tlai dar 3 thleng inhnuhdawhna hun hawn a ni ang. Ruahman dan chuan November ni 7, 2023 ah vote thlak tur niin December ni 3, 2023 (Pathianni) ah vote hi district khawpui hrang hrangah chhiar tur a ni.

MLA inthlana vote tla chhiar hun atan Pathianni ruat a ni hi political party hrang hrang, kohhran leh tlawmngai pawl te chuan an duh lo hle a. Ni 11.10.2023 a Central YMA huaihawta NGO hrang hrangte leh Political Party hrang hrang aiawh ten Election Commission of India (ECI) ah Mizoram inthlan vote chhiar hun sawn tura ngenna lehkha thehluh nise an tih angin Ningani kalta khan vote chhiar ni sawn tura ngenna hi ECI ah thawn a ni a, Pathianni leh Inrinni ni lo, nidang ruat tura ngenna lehkha hi Rajiv Kumar, Chief Election Commissioner hnenah thawn a ni. A lehkha Copy hi Chief Electoral Officer (CEO), Mizoram hnenah pek a ni bawk. Lehkha ah hian Mizorama Political Party hrang hrang AAP, BJP, MNF, MPCC, PC, ZNP, ZPM Party leh NGO hrang hrang - CYMA, MUP, MHIP, MSU, MZP President theuh ten hming an ziak a ni.