Arsenal leh Tottenham te pahnih chakna chhan tur thlir lawkna:

Mual neitu Arsenal hi kum 2010 hnuah an home-ah Tottenham hian an la hneh ngai lo.

Premier League-a an inhmachhawn hnuhnung berah Arsenal hian 2-1 in Tottenham an hneh.

Arsenal hi Premier League-a an game hnuhnung pahnihah an chak zawn mek a, an tumpui tur Spurs hi game hnih an chak lo zawn tawh thung. 

Player enin Spurs aiin Arsenal hian squad an nei tha zawk.

Premier League-a an intawn hnuhnung game 10-ah tum 7 ngawt an inhnehtawk vangin, chak zawk awm lova in draw theihna chance a tam.

Spurs leh Arsenal intum hnuhnung pangaah Arsenal hi tum khat chiah an chak.

Spurs hi game hnuhnung 5ah chak zawk mah se, heng an chakna te hi Emirates stadium a ni lo vek thung.

London hmar veng lamah khuan football club ropui tak a awm thin a, an ropui thinna hmun a nih vangin an lal ram tia sawi pawh an awm thin. Mahse, tun hnaiah hi chuan chung an lalram ropuina te chu a tla chhe chho mek. Mahse, chu an lal ram tlu chhe mek din thar leh tur chuan tan an la a, tun nipui transfer khan Premier League club zingah Arsenal hian sum an hmang hnem ber a, Spurs pawhin an hmang ve nual tho. Club ropui zawk nih tum a hma la thin pahnih hian tun nipui   hian sum an seng hnem dun hle. Chung London hmar veng club ropui zawk nih inchuh pahnih chu, zanin dar 9 hian Emirates mualah an inkhelh dawn a, a nep lovang. 

Phat rual lohvin, tunah rih hi chuan London Reds ropuina hi a tla hniam rih hle a, an ropui thinna erawhin mi an la hip a, an ropui tawh thinna te leh an khelh dan hmang mawi tak avang te in tantu an la ngah hle thung. Chutiang bawkin, Spurs hi tun hnaiah an ropui lua bik lo, North London-a roreltu tia chhal theih an ni bik lova, zanin hian tunnge ropui zawk fiahna a awm ang. 

Hetih lai hian, Premier League Club khel phak London Club zinga ropui ber tia chhal ngam Chelsea dawttu tur zawnna match ti pawhin sawi ila a sual tam awm love. 

Season bul tan ropui lem lo mahse, tun nipui transfer chhunga sum seng hnem ber an nih vangin Arsenal tantute an phur hlein a rinawm a, club neitu Kroenke Sport Enterprises (KSE) neitu Stan Kroenke laka an lungawi lohna pawh a zia deuh turah ngai ang. Player thar lei nan Arsenal hian pound maktaduai 149 zet an seng ral a ni.

Chutihrual chuan, Tottenham pawh hi sum hmang tlem a sawi chi an ni bik lo. Pound maktaduai 60 zet an seng ve tho a, fans te lawmna siamtu ber erawh Harry Kane an chan lo kha a ni awm e. Tun season-ah trophy an chawi lo a nih erawh chuan English skipper hi an chan ngeiin a rinawm. 

Tun season bul tan fuh tawk lo Arsenal hi an game hmasa pathumah ngawt an chak tawh lova, Spurs erawh an game hmasa pathumah an chak vek thung. An club hneh zingah hian champion lai Man City pawh an tel. An coach thar Nuno-a tan pawh honeymoon nuam tak ang mai a ni hman. Mahse, an vanneihnain a daih seng bik lo, Crystal Palace leh Chelsea lakah an tlawm leh hlauh thung.

Spurs hi tunah point 9 hmuin Premier League-ah pasarihna an ni mek a, Arsenal hi point 6 hmuin 13-naah an awm mek thung. Team hnih hian goal difference nei ve nual mahse, North London derby hi a hmuhnawm hle tura ngaih a ni. Team hnih te tun season a an intumna hmasa ber turah hian Emirates stadium chu a lun hle tura ngaih a ni. Fans te hmuh a tlawm zawk nih an duh dawn lo tih a chiang a, chuvangin an that dan tur ang berin an inrem ngei a rinawm.

Team 2 te hian goal thun an harsat angreng hle a, tun season chhung-in Arsenal hi goal hnih chiah an la thun a, Tottenham pawhin goal thum chiah an la thun. Target-ah Arsenal hian tum 17 an shot laiin Spurs hian tum 20 an shot tawh thung a, an shooting accuracy chu Arsenal 24% niin Tottenham hi 43% daih a ni thung.