In House Production kutchhuak Mizo film thar 'Brother Zova' chu shooting leh editing zawh fel a ni tawh a, November 26, 2022 hian Vanpa Hall-ah tlangzarh a ni ang. 'Driver Kima' film en tawhte chuan 'Brother Zova' film pawh hi an nghakhleh tawh khawp ang le. 

A film vuak hot nan leh mipui hriat tur puanchhuahna hun bakah zawhna leh chhana hun press conference chu November 12 hian an buatsaih dawn a, In House Regale Multipurpose Hall-ah neih a ni ang. He film official trailer pawh hi YouTube lamah upload tawh niin, en pawh a hlawh hle. 

Kimkimi & G'Nie
Mipui ten Brother Zova nghahhleh chhan lian tak an nei a, chu chu a changtute an ni. A changtute zingah hian Mizo model lar chuai thei lo Kimkimi leh rapper turu G'Nie te an tel a, a hit leh viau a nih pawhin a mak lo ang. Chumai a ni lo, Driver Kima film-a chang thiam em em mai Lil Toto a la awm cheu bawk - a part a rawn hneh sawh leh dawn tih ring tawp rawh!
Lil Toto talent neih that zia kan hmu chho zel a, Mizo film industry-ah hming a chher chho zel dawn. Kimikim leh G'Nie te nen an changho hi en hmaih chi a ni lo.  

Huap zau zawkin
In House Production hian kumtir lam khan film hit zet mai Driver Kima kha an tlangzarh a, premiere-na hmunah erawh sawm bik mitlemte chauh an tel. Tun tuma an film tihchhuah leh turah erawh mipui huap zau zawkin an tidawn a, a duh a piang tan chhim theih a ni ang. A hmun ngeiah mipui tam zawkin an en theih nan ticket siam a ni a, movie premiere boruak tem duh tan hmaih phal chi a ni lo ang.