Aizawl: Meghalaya state-a sawrkarna chelh mektu National Peoples Party (NPP) chuan kumin kumtawp lama Mizoram MLA inthlanpui lo awm turah chuh ve ngei an tum a, September 29, 2018 hian Mizorama an party thar puanna neih an tum. Nimin khan NPP National spokesman leh Meghalaya Home Minister ni bawk, James Sangma chu a thlenna, Hotel Regency-ah Press mi thenkhatten kawmin Mizoram inthlanpuia candidate neih an tum thu leh NPP-in inthlan chuh an tum thu hi a sawi a. NPP chu September 29, 2018 (Inrinni) hian official takin Aijal Club-ah NPP President leh Meghalaya Chief Minister ni mek, Conrad Sangma chuan a puang dawn niin a sawi bawk. Press miten tun hnaia Congress party atanga chawlhtir, R.Lalzirliana nen an inbia em tih zawhna chhangin, “R.Lalzirliana telin mi hrang hrang kan bia a, tunlai politics boruak chungchang kan sawi dun a; mahse, hei hian kan party-ah an lo lut dawn tihna a ni chuang lo a ni,” a ti. James Sangma chuan NPP chu hmarchhak bial mite insuihkhawma chak zawka central-ah ‘Aw’ an neih theih naa din a ni tih a sawi bawk. MLA election-ah thawhpui an neih dawn leh dawn loh zawhna chhangin, “Tu party nen mah inbiakna kan la nei lo a: mahse, kum khat kalta atang tawh khan nasa takin Mizoram politics hi kan lo zirchiang tawh a ni,” a ti a. Mi thenkhatten BJP-ten NPP chu sum lamah an tanpui nia an sawi chu thu dik lo a ni tih a sawi. James Sangma leh Lalrinliana Sailo, MLA te hi nimin khan an inkawm a, an inkawmna chungchangah hian MLA pahnihte hian thian tha an nih anga inkawm mai an ni tih an sawi. NPP hian Mizorama an Convener atan Lianzuala an hmang a, mi dang ruat an nei hrih lo. James Sangma hian Zirtawp zan khan Aizawl a lo lut a, vawiin hian Aizawl a chhuahsan leh ang.