Aizawl; National Population Registration hnuaia Mizoram mipui chhinchhiahna Aadhhar/UIDAI neih mekah hriat theih chinah mi 20,000 chuang hming ziahluh a ni tawh. Census deptt.-a thawktute sawi danin, National Population Registration hnuaia India mite chhinchhiahna project kal mek 'Aadhaar' (UIDAI tia hriat bawkah) hian Mizoram mi cheng zawng zawngte chu an hming, nihna, finger print leh mit naute thlalak chhinchhiah vek tur a ni a. Registration tihnan hian hun bituk a awmlo a, chhinchhiah zawh hma chu thawh tur a ni. Tunah hian 1st phase hna thawh mek a ni a, Mizoram mi cheng zinga 2.5% te hming leh nihna chu chhinchhiah fel a ni tawh a ni. Aadhaar kalpui mekah harsatna thleng emaw duhlo emaw an awm hrihlo tih Census department thawktute chuan an sawi a, mahse sakhaw thil avanga duhlo/ inziaklut hlau engemaw zat chu an awm dawn nia an hriat thu an sawi. Unique Identification Authority of India (UIDAI) chuan mi vaibelchhe 56 te hnenah Aadhaar Number hi a sem chhuak tawh a, nitin Aadhaar number hi mi nuai 13 atanga 14 te hnenah a sem chhuak a ni. Sorkar laipui hmalakna a siam Aadhaar Number hi hun reilote chhungin mi vaibelchhe 60 hnena pek tum a ni. Planning Commission Attached Office a din UIDAI hi sorkar thuchhuah angin January 2009 khan kal pui tan a ni a. UIDAI chuan Aadhaar Number hmasa ber hi September ni 29, 2010 khan a pe chhuak a. Pek-chhuah anih hma hian data an lakkhawm piah lamah finger print leh mit naute chhinchhiahna (iris images) te lak a ni. December 2012 thleng khan UIDAI chuan Aadhar Number hi vaibelchhe 25 hnenah a sem chhuak a, chhawhrualin thla khatah vaibelchhe 1 ang zel a sem chhuak a ni. Kum hlui, 2013 khan UIDAI chuan Aadhaar number hi vaibelchhe 29.1 hnenah a sem chhuak a, thlatin mi vbc. 2.4 hnena sem ang a ni. Kumin atang hian thla tinin mi vaibelchhe 3 hnenah Aadhaar Number hi a semchhuak a, ni khatah mi nuai 15-16 inkar hnenenah Aadhaar number hi pek a ni. 1. Aadhaar hi Card a ni lova, number a ni, he number awmna Card hi UID(Unique Identification) a ni. 2. He number hi India khua leh tui zawng zawng te chhinchhiahna tur digit 12 nei Personal Identification Number (PIN) a ni. 3. Aadhaar number-in a tum ber chu India khua leh tui diktak ten sorkar atanga subsidy an dawn tur ang taka an dawn theih nana siam a ni. 4. He number hi India khua leh tui zawng zawng te chuan an damchhung zawng an nei tawh dawn a ni. 5. UID Card hi neih ngei ngei tur a ni chuang lova, Driving License, Bank Account, Pan Card te ang a a mamawh tana neih tur a ni. Sorkar atanga Subsidy dawn thin i.e. Gas, Ration, Khawnvartui etc. ang chi zawng zawngte chu Aadhaar number(UID Card) neilo tan dawn theih a ni dawn tawh lo thung ang.