ZALEN October 1, 2025: Mizoram sawrkar hnuaia New Pension Scheme (NPS) hmangtute chu vawiin khan Mizoram Movement for Old Pension Scheme (MIMOPS) huaihawtin Vanapa Hall kawtah an pungkhawm a, Pension Scheme tha zawk Mizoram sawrkar lakah an phut.

MIMOPS Vice President V.L. Chhakchhuak chuan New Pension Scheme chu central sawrkarin a hnuaia thawkte tan Old Pension Scheme thlakna atana a duan niin 1.1.2004 khan a hmang tan a, Central sawrkar hian state te chu hmang ve turin tilui si lovin a tur fo a, Mizoram sawrkar pawhin 1.9.2010 atang khan a hmang tan a ni, NPS hi state sawrkar hnuneihna liau liau a ni an ti a, West Bengal chuan tun thlengin an la hmang ve duh lo a ni, a ti.

V.L. Chhakchhuak chuan Mizoramah NPS hman a nih dawn leh hman a nih hnu rei tak chhung chu a taka pension an awm mai hma kha chu NPS chhiat zia hriat a nih loh avangin sawiselna leh duhlohna thawm a ri lem lo a, NPS chhiat zia hriat a nih hnuah pawh subscriber te an la tlem vang nge Central employee leh state dang employee ten OPS demand kum 10 vel an kalpui hnuah November 2022 atang MIMOPS a lo din atang khan Mizoram-ah chuan NPS duhlohna hi auchhuahpui a ni ve ta chauh a ni, a ti.

MIMOPS te chuan sawrkarin NPS matching contribution atan thla tin a sen mek hi Crore 6.5 vel a ni mek a, Old Pension Scheme hman tir se chu regular monthly expenditure tam tham tak, pung zel bawk si hi sawrkar tan hman a ngai tawh dawn lova, sum harsatna sutkianna tangkai tak a ni pha mai tur a ni, an ti a, NPS hnuaia mi te chu service reilo te ten an nih hlawm dawn avangin an pension senso chu NPS matching contribution a senso tur nen khaikhin chuan tlemte chauh a ni ang an ti bawk.

MIMOPS te chuan NPS hnuaia pension hlawh chhiat zia tarlangin, an pension hmaa a hlawh lak hnuhnun bera Rs. 27,600 hlawh la chuan NPS pension atangin Rs. 2,060 a hlawh a, OPS chu ni se Rs. 19480 hlawh tur a ni an ti. Rs. 25500 hlawh thin chuan Rs. 1,600 a hlawh a, OPS ang chuan ni se Rs. 18,850 hlawh tur a ni an ti a, heng mi te bak mi pahum te an tarlang bawk.

Himachal Pradesh, Jharkhand, Chhatisgargh, Rajasthan, Punjam, karnataka leh Sikkim te chuan NPS hi hmang ve hman mah se, OPS-ah an a let leh tawh/let mek a ni an ti a, Maharashtra, Tripura leh Uttarakhan te chuan UPS hi an hmang tawh/hmang mek a ni, an ti.