Aizawl: Mizo Zirlai Pawl (MZP) chuan tunhnaia Assam sawrkarin National Register of Citizens (NRC) a hming awm velo te chu thenawm state ah an lut nia sawiin Mizoram an lo luh lohnan Assam leh Mizoram ramri ah te police force dahbelh turin sawrkar an ngen. MZP hruaitute hian nimin khan Aizawl Press Club-ah chanchinbumite kawmin Assam State in National Register of Citizens (NRC) final draft July 30, 2018-a a tihchhuah tak avang hian heta hming chuang lo nuai 40 chuang te chuan an State thenawm ah luhna tur an zawng dawn ngei niin a lang a, state dangate an inralrin laiin Mizoram sawrkar chu a muthlu bik ang tih an hlau hle tih an sawi a. Assam state atanga lo luh tum ILP dil an awm chuan NRC a chuang lo chu ILP pechhuak lo turin thuneitute an ngen nghal tih sawiin, Mizoram chhung hnamdangte uluk lehzuala check turin sawrkar thuneitute an phut a ni. MZP chuan hruaitute chuan August 15, 2018 ralhmaa hemi chungchanga Mizoram sawrkarin hmalakna engmah a neilo a nih chuan a tul dan ang zelin check gate te siamin hma a la dawn niin an sawi. MZP hruaitute chuan Meghalaya-ah chuan Khasi Students Union (KSU) ten Assam leh Megalaya inrinna bulah Infiltration Gate lo siamin Assam atanga luh tum thahnem tak an man a, Nagaland pawhin NRC nei lo an rama luh tum uluk taka check in Arunachal pawhin hma a la niin an sawi bawk.