ZALEN July 22, 2026: NSUI Mizoram chuan NEET leh Exam danga Paper leak nasa tak avang leh, hemi kaihhnawiha India ram zirlaiten lungawi lohna an lan tir mek chu an thlawp tih thuchhuah an siamah an tarlang. 

NSUI chuan zirlaiten an phut zawng zawng – Union Education Minister Dharmendra Pradhan ban tir te, paper leak victim zirlaite hnena zangnadawmna cheng vaibelchhe 1 pek te, Indian Education System siamthat zawng zawngte  an thlawp an ti.

India ram hmun danga lungawilohna lantirtu Zirlaite thlawpa Mizoram zirlaiten hma an la leh, punkhawm an buatsaih zawng zawngte hi NSUI (Mizoram) chuan an thlawp a. Tuma fuihpawrh ni miah lo a, dikna leh siamthat duhna avanga huaisen taka penchhuak zirlai zawng zawngte an chhuang a. Zirna humhalh tura huaisen taka penchhuak zel turin an ngen bawk a ni.

Lungawilohna lantirtu zirlai pawisawi lo te chunga Delhi Police-te chetna rapthlak tak chu pawi an ti a, Delhi Police-te leh thu petu BJP sawrkar an dem bawk.

NSUI chuan Zirlaite hnena zirna tha ber pek tum aia Hindu sakhaw vulh lenna hmuna siam tum tlat tu leh, chutiang zawnga hma la rengtu Central BJP sawrkar hi an dem thu an tarlang a. Education system siamtha tura zirlaite hmalakna zawng zawng an thlawp zel dawn a, India ram leh Mizoram zirna siamtha turin theihtawp an chhuah zel dawn an ti bawk.