Aizawl: Central Board of Secondary Education (CBSE) hnuaia kalpui thin Junior Research Fellowship (JRF) hmuh theihna leh college chin chung lam lecturer nih theihna tura paltlang National Eligibility Test (NET) exam chu exam neih leh atangin National Testing Agency din tharin zawhna an siam zel tawh dawn.   Thudawn danin NET exam zawhna siamtu tur leh a exam huaihawttu hi test hrang hrang felfai tak leh thianghlim taka kalpuitu tura duan NTA hian sorkar laipuia Human Resource Development ministry hmalaknain a kalpui tawh dawn a. He exam hi computer hmang chauha chhan a ni tawh dawn a, exam chhangtu turte pawhin exam hun atan ni 1 chauh ruahman a nih dawn loh avangin an remchan ni an thlang thei tawh ang.   NET exam hmasa ber hi December, 2018-ah a ni dawn a, exam turte chuan December 2 atanga December 16, 2018 chhungah an remchan ni ber an thlang thei dawn a ni. NET exam hi kum khatah vawi 1 neih a ni tawh dawn a. Exam dan thar hnuaiah hian syllabus, zawhna kalphung leh exam fee zatah tihdanglam a awm lo ang. NTA hian exam dang, zirna chi hrang hrang luhna - medical lamah NEET, engineering lamah JET, management lamah CMAT leh pharmacy lamah GPAT te chu a huaihawt tawh dawn bawk a ni.